Mediat
Dáppe gávnnat dieđuid
Sámiráđi čoahkkimat
Sámiráđđi lágida dievasčoahkkimiid dábálaččat guktii jagis nu, ahte vuosttas čoahkkin lea giđđadálvve njukča-cuoŋománus ja nubbi čoahkkin lea čakčat čakča-golggotmánus. Dát sáhttet dieđus rievdat. Čoahkkimiid oktavuođas lágiduvvo dábálepmosit maiddái eará čoahkkimat, dego ee. sámiráđi kulturlávdegotti čoahkkin, fáddáseminárat ja eará vejoláš sámiráđi čoahkkimat. Sámiráđi čoahkkimat ja lágideamit leat rahpasat buohkaide. Spiehkastahkan leat kulturlávdegotti čoahkkimat dalle go meannuduvvojit kulturruhtaohcamat. Čoahkkimiid birra oažžu goit dieđuid čoahkkima maŋŋá.
Sámiráđi váldodáhpáhusas, sámiid konfereanssas, buktojuvvo ovdan válljejuvvon fáddá, man konferensa vuodju suokkardit vuđoleabbot. Maiddái konfereassa oktavuođas lágiduvvo seminárat ja eará lasse- ja raddálasdáhpáhusat.
Sámiráđi vierrun ja prinsihpan lea leamaš lágidit čoahkkimiiddaset ja konfereassaid vurrolagaid sámiid orrunguovllus Davviriikkaiguin ja Guoládagas. Čoahkkimiid oktavuođas lea dábálaččat maid kulturprográmma, man maŋŋá eahkedis servvoštallamat joatkašuvvet čoahkkinbáikki hoteallaiguin, gos dávjá lágiduvvo maid konsearttat.
Eará čoahkkimat
Sámiráđđi lea mieldi lágideamen ja/dahje oassálasta álbmogiidgaskasaš čoahkkimiidda sihke máŋgga eará čoahkkanemiide, maid eará eamiálbmogiid searvvit, NGO-searvvit ja ráđđehusat ordnejit.
Sámiráđđi lea dávjá mieldi maid čoahkkinproseassaiguin, masa gullet máŋggat válbmenčoahkkimat (Preparatory Committees, PrepCom) ja váldočoahkkin (Summit). Dát guhkit válbmemat lea mihtilmasat ON čoahkkimiid olis ja ON erenoamáš fáttáid lágádusaide ja ásahusaide. Dákkár proseassat sáhttet bistit beannotjagi ja vejolaččat vel guhkitge. ON systema siskkobealdi muhtun ášši gieđahallaproseassa logi jagi áigodagat leat hui dábálaččat, dego ON eamiálbmogiid 10-jagi áigodat. Lassin stuorra čoahkkimiid olis lágiduvvojit álot raddálágaid siido- ja bálddalasdáhpáhusat, dego vaikko čájáhusat, ságastallan dilálašvuođat ded.
| 
