Jagi 2016 girjjálašvuođabálkkašupmi Siri Broch Johansenii

Sámiráđđi lea mearridan ahte Siri Broch Johansen oažžu jagi 2016 girjjálašvuođabálkkašumi nuoraidromána ovddas ”Mun lean čuoigi”.

Árvvoštallanlávdegoddi cealká earret eará ná:

Siri Broch Johansen govvida bures movt sámi nuorat šaddet bajás ovttain julggiin sámi kultuvrras ja nuppiin julggiin ođđaáiggi máilmmis. Muitalusas lea olu man beallešaddit soitet dovdat dehe ieža vásihit ja dat geasuha lohkki, fille su beroštit muitalusa nuoraid birra. Girječálli duostá čállit tabuaáššiid birra, dego seksa ja jápmima birra. Girji guoskkaha dovdduid dego ráhkisvuođa, balu, heahpaneami ja morraša rabas ládje bártni perspektiivvas. Das lea njuovžilis ja gehppes giella mii heive bures nuorra lohkkiide. Muitalus čuohcá dovdduide, joksá lohkki váimmu ja báhcá guhka muitui.

Geigendilálašvuohta lea Gironis, golggotmánu 22. beaivvi, dii 20:00, Arctic Eden hoteallas.

Girjji lea ČálliidLágádus ilbmadan jagis 2014. Lágádus čállá ieš ná girjii birra:

http://www.calliidlagadus.org/web/index.php?egavpi=1&girji=360&giella1=sam  

Girjjalašvuođabálkkašupmi

Sámiráđi girjjalašvuođabálkkašumi ulbmilin lea movttiidahttit olbmuid čállit. Bálkkašupmi buktá beaggima čállii ja dahká sámi girjjálašvuođa dovddusin. Girjjalašvuođabálkkašumi álgogiella galgá leat sámegiella. Unnitlogu sámegillii jorgaluvvon girji sáhttá goit maid dohkkehuvvot. Bálkkašupmi geigejuvvo juohke nuppi jagi, ja molsašuddá gaskal mánáidgirjji ja ollesolbmogirjji.

Sámiráđi girjjalašvuođabálkkašumit 1994-2016

Jahki Girji Girječálli Govvideaddji
1994 Mu ustibat Iraida Vinogradova Peter Popov
1994 Šerres beaivi Elvira Galkina Jakov Jakovlev
1995 Juohkásan várri Olavi Paltto
1996 Hoŋkoŋ dohkká Ulla Pirttijärvi
1997 Ii fal dan dihte Inghilda Tapio Ulrika Tapio
1998 Jåvvå Gun Aira/ Ingegaard Vannar Aino Hivand
1999 Bearralat Deatnogáttis Eino V. Guttorm
2000 Biehtár ja Duommá jávren stulliba Stig Riemmbe Gælok Kjell Ove Storvik
2002 Čiežain čáziin Harald Gaski Lars Nordström
2003 Árbbolaččat, nubbi oassi Jovnna-Ánde Vest
2004-2005 Čábbámus iđitguovssu Elle Márjá Vars Trygve Lund Guttormsen
2006 Meahci šuvas bohciidit ságat Synnøve Persen
2007 Máilmmi láikkimus olmmoš Elle Márjá Vars Harald Aadnevik
2009 Lihkkošalmmái Rauni Magga Lukkari
2011 Sárá beaivegirji Siri Broch Johansen Bjørg Monsen Vars
2014 Amas amas amasmuvvat Niillas Holmberg Antti Väre
2016 Mun lean čuoigi Siri Broch Johansen