Arkiiva

Sámiráđđi dieđiha Norgga badjelgeahččanvuođas

Sámiráđđi dieđiha ON lahttostáhtaide, EU:i ja Eurohpáráđđái ahte Norga badjelgeahččá nállevealahuskomitea mearrádusa bissehit bieggafápmorusttega ráhkadusbargguid Åarjel Njaarke Sijte árbevirolaš eatnamiin Fovsenis.

Juovlamánu 21.b. 2018 dieđihii Norga virggálaččat, ahte stáhta badjelgeahččá ON nállevealahuskomitea (CERD) mearrádusa bissehit bieggafápmorusttega ráhkadusbargguid Åarjel Njaarke Sijte árbevirolaš eatnamiin Fovsenis. Nállevealahuskomitea dagai mearrádusa ráhkadusbargguid gaskaboddasaš bisseheamis juovlamánu 10.b. 2018 CERD:a čoahkkinortnega njuolggadusa 94 (3) mielde.

 

Sámiráđi presideanta, Åsa Larsson Blind, lea hirpmástuvvan go Norga ii jeagat ON soahpamušorgána, muhto baicca čiđđá vuosttaldit ON nállevalahuskomitea mearrádusa.  

 

-Norga beahttá sámiid ja máilmmiorganisašuvnna ja iktá duohta ámadeajus, go badjelgeahččá CERD:a mearrádusa ja suovvá bieggafápmorusttega ráhkadusbargguid joatkašuvvat Fovsen Njaarkes. Dát dahku ii soaba dan govvii man Norga liiko čájáhallat alddes dakkár stáhtan mii osku lágaid doahttaleapmái ja olmmošvuoigatvuođaid gudnejahttimii, dadjá Sámiráđi presideanta Åsa Larsson Blind.

 

Reivves mii sáddejuvvo buot ON-sáttatgottiide mat ovddastit riikkaidgaskasaš nállevealahuskonvenšuvnna (ICERD) ratifiseren stáhtaid, EU:i ja Eurohpáráđđái odne, muitala Sámiráđđi ahte Norga lea nággen badjelgeahččat ON soahpamušorgána mearrádusa.  

 

-CERD:a mearrádusa badjelgeahččamiin ii čájet Norga dušše ahte gudnejahttá olmmošvuoigatvuođaid duššefal dalle go eai vuostálastte stáhta iežas beroštumiid, muhto ávžžuha velá jeagoheamet meannudit ON soahpamušvuogádagain, čállá Blind.

 

Bieggafápmorusttega huksen Fovsenis Trøndelagas vaháguhttá garrasit Åarjel-Njárkke boazoguohtunguovllu, ja rievvu guovllu boazosámiin vejolašvuođaid seailluhit suvdinnávccalaš eallinvuogi, árbevirolaš boazodoalu, mii lea oarjelsámiid kultuvrralaš identiteahta válddahat. Sámiráđđi lea veahkehan Åarjel Njaarke Sijte váidalit Fovsena bieggafápmorusttega huksema ON nállevealahuskomiteai.