Arkiiva

Sámiráđi girjjálašvuođabálkkašumi vuoiti lea mearriduvvon

Suoma čálli Rauni Manninen vuoitá girrjjiinis "Áhčči min" Sámiráđi girrjálašvuođabálkkašumi 2018.

 

Rauni Manninen vuoitá Sámiráđi girjjálašvuođabálkkašumi 2018

 

Sámiráđđi lea mearridan ahte Rauni Manninen oažžu dán jagi girjjálašvuođabálkkašumi romána ”Áhčči min” ovddas. Árvvoštallanlávdegoddi cealká ná:

 

Rauni Manninen romána Áhčči min lea almmuhuvvon Iđut lágádusas (2018). Girjji dáhpáhusat álget Sámis, Davvi-Suomas, goas nu 1940-logu álggus ja bistet gitta 1900-lohppii. Váldopersovnna Josáha oadjebas beaivvit nohket, go son ovttas nuorra eamidiin Rávnnáin ja unna nieiddažiin fertejit vuolgit eváhkkomátkái dálvvesoađi loahpas. Maŋŋil soađi sii ásahit fas ođđa eallima ruovttubáikái. Birgejupmi lea garra barggu, dálkkiid ja Ipmil áhči dáhtu duohken. Bures govviduvvo mo siidaguoimmit veahkehallet nuppiideaset jos lea heahtedilli. Josát guoktá mánnáčora stuorru, ja Josát garra bargguin ja imaštallamiin, veahá dego láhppon dán máilbmái, ii oainne eará go ahte eallin ferte dán eatnamis ellojuvvot: ”Go beare dállodišgoahtit. Nuhan almmilottitge.” Eallima rašes ja morašlaš bealit, nu mo máná massin ja go ferte mánáid sáddet ásodahkii, leat fiidnát ja álásin govviduvvon, lohkki váibmu njuorrá. Máilmmis lea maiddái illu, go mánát sturrot ja birgejupmi lea buorre. Jurddašeaddji váldopersovnna jurdagat, dagut ja bargovuohki addet lohkkái gova sámi árbevirolaš eallinfilosofiijas ja luondduáddejumis, ja mo dološ eallinvuohki nuppástuvvá maŋŋil soađi. Go lea lohkan Áhčči min romána, mii lea nu sátnerikkis, ja mas leat sátnevájaslágan dajaldagat ja somás ge mohkit, de lea rahpasan sátneriggodat ja soaitá giella maid ovdánan.

Sámiráđi girjjálašvuođabálkkašupmi geigejuvvui vuosttaš geardde 1994:s. Bálkkašupmi geigejuvvo juohke nuppi jagi, ja molsašuddá gaskal mánáidgirjji ja ollesolbmogirjji.

Kulturossodaga jođiheaddji, Christina Hætta, muitala ahte ledje boahtán olu buorit evttohusat lágádusain bálkkašupmái mii dán jagi gálggai geigejuvvot ollesolbmogirjái:

 

- Sámi girjjálašvuohta čájeha dáid bokte ahte das lea buorre dássi ja Sámiráđi ulbmil bálkkašumiin lea ge movttiidahttit olbmuid čállit ja čalmmustahttit sámi girjjálašvuođa.

Rauni Manninen lea dán jagi almmuhan girjji “Áhčči min” Iđut lágádusa bokte ja girji lea ge oalle aitto boahtán sámi girjjegávppi hilduide. Lágádusa bealis celket ná girječálli birra:

 

- Iđut-lágádus sávvá čállái lihku bálkkašumiin. Duostilis čálli, govvida eallima ilu ja morraša!

 

Rauni Manninen

Rauni Manninen, dahje Luobbal-Jovsset Rauni, (r. 1946) lea eret Ohcejogas, Suomas. Son lea bajásšaddan dalle go lei čohkkendállodoallu, ja lea vásihan mo dat muhttašuvvá ruhtadállodoallun, ja makkár rievdadusaid dat mielddisbuktet. Rauni Manninen almmuha dál iežas vuosttaš romána, Áhčči Min. Dáinna girjjiin son čájeha ahte lea álbmoteallima govvideaddji ja ruovttuguovllu čálli.

 

Geigendilálašvuohta lea Anáris, Čakčamánu 22. beaivvi, dii 19:00, Kultahovi hoteallas.