Arkiiva

Sámiráđi ođđa presideanta

Sámiráđđi lea válljen Åsa Larsson Blinda ođđa presideantan.

Åsa Larsson Blind (36) válljejuvvui lávvordága 11.02.2017 ovttajienalaččat ođđa presideantan Sámiráđđái. Larsson Blind váldá badjelasas doaimma Áile Jávo maŋis guhte leamašan presideantan Sámiráđis 2013 rájes.

Åsa Larsson Blind boahtá boazodoallobearrašin Ran čearus Ruoŧabeal Samis. Son ássá dál Badje Sohpparis iežas isidiin ja golmmain mánáin. Larsson Blindas lea Filosofie Magistereksámen mas deaddu lea bargiid- ja bargodiliáššiide. 

-       Munnje lea stuorra gudnin go beasan jođihit Sámiráđi čuovvovaš guokte jagi. Sámekonferánsa lea hui čielgasit čujuhan bálgá Sámiráđi bargui boahtte njeallje jahkkái, ja lea hi miellagiddevaš beassat jođihit dan barggu, cealká Åsa Larsson Blind. 

Sámiráđđi lea Suoma, Norgga, Ruošša ja Ruoŧa sámi organisašuvnnaid eaktodáhtolaš ja iešráđálaš kulturpolitihkalaš ja politihkalaš ovttasbargosearvi. Sámiráđi bajimuš orgána lea sámekonferánsa mii lágiduvvo juohke njealját jagi, ja dán jagi dat lágiduvvui Tråantes. Sámiráđi váldoulbmilin lea gozihit sámiid ovdduid álbmogin, nannet sámiid oktiigullevašvuođa riikkarájáid rastá oktan álbmogin ja eamiálbmogin ja bargat, ahte sápmelaččat maiddái boahttevuođas dohkkehuvvojit oktan álbmogin ja eamiálbmogin, man kultuvrralaš, politihkalaš, ekonomalaš, siviila, sosiálalaš ja  vuoiŋŋalaš vuoigatvuođat sihkkarastojit guđege riikka láhkaásahusain, guoskevaš riikkaid ja sámiid ovddasteaddji orgánaid gaskasaš soahpamušaiguin ja álbmotrievttálaš šiehtadusaiguin muđui. Sámiráđđi bargá maiddái riikkaidgaskasaččat sápmelaččaid ja eará eamiálbmogiid beroštumiid ja vuoigatvuođaid ovddideami ja sihkkarastima várás. 

Sámiid 21. Konferánsa lágiduvvui Tråantes 09.-11.02.2017 ja čuovvovaš áirasat válljejuvvojedje Sámiráđđái áigodahkii 2017-2021:

Åsa Larsson Blind (SSR)

Lea Simma (SSR)

Kristina Nordling (RSÄ)

Karin Vannar (RÄF)

Ol Johan Gaup (NSR)

Christina Henriksen (NSR)

Ellinor Marita Jåma (NBR)

Ellen Inga Turi (NBR)

Bjørg Bonk (SÁL)

Jevgenij Kirillov (AKS)

Ivan Matrekhin (OOSMO)

Niko Valkeapää (SSG)

Piia Nuorgam (SSG)

Áslat Holmberg (SSG)

Saara Tervaniemi (SGG)