Sámiid 20. konferánsa

Sámiid 20. Konferánsa lágiduvvui Murmánskkas miessemánu 2.-4.beaivvi. Sámekonferánssas lei fáddán Sápmi 2053 – Sámi kultuvra dilli lassáneaddji industriijaovdáneami dáfus - mas ovdanbiddjojedje hui dehálaš gažaldagat sámi servodaga guovdu. Konferánsa attii sápmelaččaide njealji riikkas earenoamáš vejolašvuođa deaivvadit digaštallan dihte áššiid mat leat oktasaččat sápmelaččaide álbmogin. Konferánsa dohkkehii Kuellnegk Neark julggaštusa ja čieža resolušuvnna maid miellahttoorganisašuvnnaid sáttaolbmot ledje ovddidan. Julggaštus ja resolušuvnnat leat vuođđun Sámiráđi boahtte njealji jagi politihkkii. Dát lea mandáhttan Sámiráđi doibmii riikkaidgaskasaš báikkiin: ON olmmošvuoigatvuođa - mekanismmain, Árktalaš ráđis ja Sámiráđi kulturbarggus. Konferánsa lea maiddái báiki gos riikaviidosaš sámi organisašuvnnat deaivvadit digaštallat, juogadit vásáhusaid ja ovdánahttit politihka.  Vásáhusat ja bohtosat váldojit mielde ruovttoluotta organisašuvnnaide ja leat oaivadeaddjin sin beaivválaš doibmii. 

Váldofáddá Sápmi 2053 – Sámi kultuvrra dilli lassáneaddji industriijaovdáneami dáfus  vásedin bajásčuvgejuvvui ja digaštallojuvvui beaivesemináras. Bovdejuvvon logaldallit ovdanbukte áššečuolmmaid dan birra mot sámi álbmot galgá seailluhit iežas identitehta ja kultuvrra go čađat biddjo eanet guovdilastin davviguovlluide, industriijaovdáneapmái ja ii- ođasmahtti resurssaid ávkkástallamii árbevirolaš sámi guovlluin. Hástalusat gažaldaga ektui gii lea sápmelaš ja gii sáhttá jienastit ja searvat Sámediggeválgii gos Sámedikkit leat ásahuvvon, digaštallojuvvui maiddái.

Sámiráđis leat guokte miellahttoorganisašuvnna ruošša bealde. Murmánskka ja biras sámisearvi (OOSMO) lágidii konferánssa ja kulturprográmma konferánssa oktavuođas. Nuoraidsearvvi Sam Nurasj miellahtut veahkehedje praktihkalaččat iešalddis čađahit konferánssa.

Konferánssa mearrádusat

Sámekonferánsa vuođđudii válgalávdegotti ja guokte bargojoavkku, ovtta resolušuvnnaide ja nuppi julggaštussii. Resolušuvdnalávdegoddi meannudii resolušuvnnaid mat ovdanbiddjojedje konferánssas. Sámiráđi ossodatjođiheaddjit ráhkadedje evttohusa Kuellnegk Neark Julggaštussii, mii ovdanbuktojuvvui konferánsii. Julggaštuslávdegoddi meannudii lasáhus- ja rievdadusevttohusaid mat konferánssas bohte ovdan. Válgalávdegoddi čohkkii sisa evttohusaid ráđđemiellahtuide boahtte áigodahkii dan njealji riikka juhkosiin maid vuollái gullet iešguđetge riikkaid sáttaolbmot. Ollislaš evttohus biddjui konferánssa ovdii ja ođđa Sámiráđđái válljejuvvojedje 15 miellahtu ja sadjásaš miellahtu jagiide 2013-2017.

Dás oainnát geat leat lahtut Sámiráđis >>

Sámekonferánsa dohkkehii čieža resolušuvnna dákkár fáttáid birra:

  •  Psykososiála dearvvašvuohta
  • Vealaheapmi sápmelaččain
  • Barentsovttasbargu
  • Sámedikkiid válgaáigodagat
  • Sámi nuorat ja árbevirolaš ealáhusat
  • Boraspireváttisvuođat boazodoalloguovlluin
  • Stáhtaidgaskasaš šiehtadallamat (rádje-jogaid alde). 

Deklarašuvdna lei dákkár fáttáid birra: industriála doaibma Sámis, Sámi identitehta, dálkkádatrievdadusat ja biras ja sámi árbevirolaš ealáhusat.

Dás gávnnat visot dokumeanttaid konfereanssas >>

To top