Mihttu lea sihkkarastit buori dearvvašvuođa ja ovddidit eallinkvaliteahta buohkaide, buot agiin.







Lea eaktun ahte buohkat sáhttet eallit dearvvas ja dearvvašlaš eallimiid jus galgat olahit ceavzilis ovdáneami. Dearvvas ja dearvvašlaš eallin mearkkaša ahte lea riekti buhtes áibmui, čáhcái ja bibmui. Dearvvas ja dearvvašlaš eallimii gullá maiddá gullevašvuohta kultuvrii, dahje servodahkii. 

 

Sápmelaččain sáhttá leat eallinipmárdus mii lea earálágan go dat mii stuorraservodagas lea. Goitge lea maiddá sápmelaččain vuoigatvuohta ipmirduvvot sihke gielalaččat ja kultuvrralaččat go boahtit ásahusaide dearvvašvuođa- ja sosiáladoaimmahagaide. Danne ferte dearvvašvuođabarggin leat sámi kultur- ja giellagelbbolašvuohta. Olahit ollislaš ja ovttadássásaš dearvvašvuođa- ja sosiálabálvalusa sápmelaččaide, ferte vuoruhit oččodit ja oahpahit sámi dearvvašvuođabargiid ja fágaolbmuid. Sápmelaččat galget dasa lassin oažžut áššáigullevaš ja ođasmahtton dieđuid sámegillii buozalmasvuođaid, dikšunvugiid ja veahkkebálvalusaid birra. Sápmelaččaid iežaset medisiinnalaš árbevierut fertejit maiddá árvvus atnot ja dohkkehuvvot.

 

ON eamiálbmotjulggaštus deattuha ahte eamiálbmogiin lea vuoigatvuohta oažžut buotlágan sosiála- ja dearvvašvuođabálvalusaid, áibba vealaheami haga (artihkkal 24).