Bisset vaššiságaid sápmelaččaid vuostá!
Sárggus/illustrašuvdna: Tjåenieh // Katarina Blind
Bisset vaššiságaid sápmelaččaid vuostá!
Vaššiságat sápmelaččaid vuostá leat issorasat laskán ruoŧabeale Sámis maŋŋá Girjásduomu, gos Ruoŧa alimusriekti nannii ahte Girjás čearus dat leat vuoigatvuođat hálddašit bivddu ja guolásteami guovllus.
Iešguđet neahttasiidduin leat boahttán njuolgut áitagat Girjása čearu miellahtuid vuostá ja maid olles sámi álbmoga vuostá. Muhtimat leat bivdán sápmelaččaid sorbmet iežaset. Earát ges ávžžuhit bohccuid goddit, juogo namaheamet dahje olles namain.
Sámiráđđi lea hirpmástuvvan go oaidná man olu vašši ja cielaheapmi sápmelaččaid vuostá gávdno, ja deattuha ahte dán eat sáhte goassige dohkkehit. Sámiid Riikkasearvi (SSR) lea ávžžuhan duođaštit ja váidit visot cielahemiid ja áitagiid, ja lea maid fállan veahkehit jus gii ge dan sihta.
Dán áššis Sámiráđđi ollásit doarju miellahttusearváme ja ávžžuhat ge buot sápmelaččaid ja earáid ovttas vuosttildit cielahemiid, sihke neahtas ja muđuid servodagas.
Sierraoaivilvuohta lea ortnegis, muhto ii leat dan dihte doahkálaš fallehit ovttaskas olbmuid dahje joavkkuid cielahemiiguin dahje áitagiiguin. Sápmelaččat dávjá vásihit eahpeáššálašvuođa, cielahemiid ja vaššiságaid, erenoamážit go lea vuoigatvuođaid birra sáhka. Min servodagas leat juo menddo olu iešsoardimat, ja mii ballat ahte psyhkalaš vuortnuheapmi ii daga buori min servodaga dearvvašvuođadillái. Statistihkka čájeha ahte sápmelaččat vásihit eambbo vealaheami ja veahkaválddi go eanetloguálbmot, ja dan ferte váldit duođas.
Sámiráđđi ávžžuha dál min verddiid stuorraservodagas doarjut sihke Girjás čearu miellahtuid ja sámi álbmoga.