Dájdakodisilla almmustahttin nanne sámi dáidda- ja kultursuorggi
Govva: Sámiráđđi / Fanny Larsson-Auna
Sámiráđđi almmustahttá Dájdakodisilla, raportta dálá rádjeeastagiid birra Sámi kultursuorgái. Raporta vuođđuduvvá sámi dáidda- ja kultursuorggi vásáhusaide ja dárbbuide, ja das leat konkrehta ávžžuhusat ja vuoruheamit davviriikkalaš stáhtaide ja sámedikkiide.
Izabel Nordlund, Katarina Blind ja Christina Hætta.
Govva: Sámiráđđi / Fanny Larsson-Auna
Dájdakodisilla namma lea ožžon inspirašuvnna jagi 1751 historjjálaš Lappekodisillas - rádjesoahpamušas mii lea dahkkon dalle go stáhtat nu mo mii dovdat daid, ceggejedje iežaset rájáid, ja mii ain dássážii sihkkarastá boazosámiide rievtti rasttildit stáhtarájáid. Dájdakodisilla ulbmil lea leat muittuhussan das, ahte sámi dáiddasuorgi lea okta oktasaš suorgi, ja ahte mii dárbbašit struktuvrraid mat dovddastit dan.
“Sámi dáiddárat ja kultursuorgi vásihit dál stuorra ja lassáneaddji riikkaidgaskasaš dovddasteami ja beroštumi. Sámedáiddáriin lea áidnalunddot vuolggasadji márkaniidda olles Sámis ja máilmmis, muhto potensiála hehttejit struktuvrralaš rádjeeastagat, maidda lea áigi gávdnat buriid čovdosiid,” dadjá Sámiráđi kulturossodaga jođiheaddji Christina Hætta.
Dájdakodisilla lea illustreren Katarina Blind, gii lea dovddus maiddá Tjanieh-namaini sosiála mediain. Iežas dovddus humoristtalaš vugiin son čalmmustahttá rádjeeastagiid ja čuolmmaid maid sámi dáidda- ja kulturbargit vásihit otná beaivve.
Raporta almmuhuvvo KulturSápmi áigge Ohcejogas, ja Arctic Arts Summit áigge Upmejes.
Raporta almmustahttojuvvo oassin Interreg Aurora ruhtadan ReCap ASáp: Regaining capacity in a changing Sápmi -prošeavtta, man ulbmilin lea buoridit máhttovuođu ja ovddidit fátmmasteami sámiide guoskevaš mearrádusdahkamis. Oassin dás prošeakta lea čohkken árbediehtiid ja áššedovdiid guđa iešguđet máhttojovkui. Okta dain lea guorahallan rádjeeastagiid kultursuorgái Sámis.
Dán máhttojoavkku boađusin šattai Dájdakodisilla, mii sisttisdoallá konkrehta ávžžuhusaid ja vuoruhemiid ja deattuha sámiid vuoigatvuohta iešmearrideapmái ja Sámeeatnama gárggiideami.