Golbma áŋgiris oasseváldi leat gergosat álggahit váikkuhanprográmmas!

Izabel Nordlund (govva: Carl-Johan Utsi), Per-Henning Mathisen ja Janne Hirvasvuopio (govva: Ville Fofonoff)

Sámiráđđi, Suoma Sámiid Guovddášsearvi ja Interreg Aurora ruhtadan prošeakta ReCap ASáp: Regaining capacity in a changing Sápmi lea ilus go beassá almmuhit ahte leat virgádan golbma hui áŋgiris ja árjjalaš oasseváldiid min váikkuhanprográmmii! Dát golbma oasseváldi leat Izabel Nordlund (RUO), Per-Henning Mathisen (NOR) ja Janne Hirvasvuopio (SUO).

— “Mii leat movtta go sáhttit sávvat bures boahtima min golmma oasseváldái váikkuhanprográmmii,” dadjá Åsa Larsson Blind, ReCap ASáp prošeaktajođiheaddji. “Ledje máŋga buori ohcci, ja hástalussan lei válljet dan golbma evttohasa. Sin duogážiin ja áŋgiruššamiin Sámi ovddas, mii jáhkkit ahte sis lea dat maid dárbbašit vai ain sáhttet ovddidit ja bargat sámi ja álgoálbmotáššiiguin nationála ja riikkaidgaskasaš dásis.”

Oasseváldit bohtet iešguđetlágan duogážiin, ja sis leat iešguđetlágan geahččanguovllut ja máhtut surggiin nugo dutkamis, juridihkas ja kultuvrras. Sin máŋggalágan vásihusat addet mávssolaš gova nubbi nubbái ja olles Sápmái. Váikkuhanprográmmii oassálastima bokte ovdánahttet sii iežaset attaldagaid ja ráhkkanahttet sii vel eanet boahttevaš bargguide sámi áššiiguin.

— ”Váikkuhanprográmma addá vejolašvuođa oažžut buori ipmárdusa das mo sámi organisašuvnnat barget sámi geahččanguovlluid ovddidemiin. Dat addá ođđa jienaide vejolašvuođa ovdánit viidáseappot, ja ovddidit iežas Sámi ovddasteaddjin.”

Jahkásaš prográmma áigge besset oasseváldit ovdánahttit gelbbolašvuođaid teorehtalaš ja geavatlaš bargguid bokte, lassin oažžut geavatlaš hárjáneami sámi organisašuvdnabargguin. Prográmma lea oassi ReCap ASáp prošeavttas, mii galgá nannet sámi siviilaservodaga, ja ovddidit jođiheddjiid geat sáhttet dahkat rievdádusaid máilmmis mii rievdá jođánit.

Rune Fjellheim ja Petra Laiti leaba virgáduvvon oasseváldiid mentorin, ja čuovvuba sin dárkilit miehtá prográmma.