Gunn-Britt Retter lea nammaduvvon Suoma lejjona ortnega riddárin su áŋgiruššama ovddas Árktalaš riikaidgaskasaš ovttasbarggus máŋggaid jagiid čađa.
Govva: Embassy of Finland
Suoma ambassadevra Mikael Antell deattuhii erenoamážit Rettera barggu Suoma Árktalaš ráđi jođihangotti áigge 2017-2019. Dalle Retter ražai bures Sámi álbmoga bealis ja Árktalaš ovttasbarggu nammii.
Dákkár nammadeapmi bođii gal hui vuorddekeahttá. Dovddan sihke gutni ja vuollegašvuođa dainna. Mun dulkon geigema nu ahte leat giitevačča buori ovttasbarggu ovddas Árktalaš ráđis. Sihke Suopma ja mii han sávvat ahte dat galggašii lihkostuvvat ovttasbargguarenan, cealká Retter ánssášumi ektui.
Retter lea bargan Árktalaš áššiiguin 20 jagi, ja lea ásahan erenomaš gelbbolašvuođa ja viiddis fierpmádaga. Sámiráđđi lea giitevaš ja rámis go Retter lea Sámiráđi bargi, ja mii lea giitevaččat go son diktá Sámiráđi ávkkástallat su viiddis gelbbolašvuođa ja nana bargokapasitehta. Son lea jagiid mielde šaddan offelažžan Árktalaš ovttasbarggus, ja máiddai riikaidgaskasaš álgoálbmot fierpmádagas - erenomažit dálkkádat- ja birasáššiin. Son maid áinnas juogada vásáhusaidas ja gelbolašvuođas earáiguin ja doaibmá ge rávvejeaddjin máŋggaid ođđa ja nuorat mielbargiide. Mii doaivut dát ánsugeigejupmi movttidahttášii su joatkit dehálaš barggustis ja áŋgiruššama máŋggalot jagi vel ovddosguvlui.