Jagi 2020 girjjálašvuođa bálkkašupmi Kirste Palttoi
Sámiráđđi geige jagi 2020 girjjálašvuođabálkkašumi Kirste Palttoi su romána ”Luohtojávrri oainnáhusat” ovddas.
Árvvoštallanlávdegoddi celkkii earret eará ná:
– Čálli geavaha sámi muitalanárbevieru ođasmahtti ja hutkás lági mielde, ja rohtte lohkki mielde muitalussii. Deaivvadeapmi nubbi máilmmi olbmuiguin ja elliiguin háleštit, leat dábálaš dáhpáhusat dán muitalusas. Luohtojávrri imašlaš máilbmi muittuha lohkki ahte gaskavuohta meahccefámuide, ja máhttit meahccefámuiguin birgehallat, lea oassi sámi árbevierus. Dán gaskavuođas leat árvvut ja máhttu maid sámit eai galggašedje vajáldahttit, baicce gáhttet ja atnit árvvus. Geat vel buoret ofelaččat go duostilis, hutkas ja hágas mánát. Seammás go čálli dáinna girjjiin láidesta máná sámi njálmmálaš árbbi máilbmái, son maiddái leahkku máná iežas govahallan- ja hutkanmovtta.
Geigendilálašvuohta lei KulturSápmi konferánssas, skábmamánu 3. beaivvi 2020. Girjji lea Davvi Girji lágádus ilbmadan 2016:s. Lágádus ieš cealká ná vuoiti birra:
– Davvi Girji sávvá lihkku Kirste Palttoi Sámiráđi girjjálašvuođa bálkkašumiin 2020. Lágádussii lea hirbmat stuorra gudni go min čálli Kirste Paltto dál lea ožžon dán jagáš Sámiráđi girjjálašvuođa bálkkášumi.
Sámiráđi girjjálašvuođabálkkašumi 2020 oažžuma oktavuođas Kirste Paltto cealká:
– Dát bálkkášupmi addá movtta čállit ain mánáide máidnasiid. Anán dan gudnin ja čielga oaivilin dasa, ahte sámemánáide galgá ain čállit sámegillii buriid máidnasiid ja muitalusaid. Giittán bálkkášumi addi Sámiráđi ja girjji olggosaddi Davvi Girjji ja čohkkedan čállit fas ođđa girjji.
Kirste Paltto – riegádan 1947:s ja bajásšaddan Fierranjogas Deanuleagis, Ohcejoga gielddas. Kirste ássá dál Roavvenjárggas. Son lea sámi vuosttaš nissončálli ja sus almmustuvai vuosttaš noveallačoakkáldat Soagŋu jagis 1971.
