KulturSápmi lágiduvvo digitála hámis 3-4.11.2020
Sámiráđđi lágida ovttas Sámedikkiin norgabealde ja Innuvašuvdna Norggain digitála konferánsa KulturSápmi skábmamánu 3.-4. b. 2020. Prográmma ja dieđiheampi KulturSápmi neahttasiiddus www.kultursapmi.com.
KulturSápmi lea jahkásaš gávnnadanbáiki Sámi dáidda- ja kultursuorgái Sámis, ja lágiduvvui vuosttáš háve Gironis jagi 2019. Koronapandemiija geažil dán jagaš KulturSápmi lágiduvvo digitála hámis, ja konferánssas beassat gullat makkár ođđa dáidda- ja kulturprošeavttat leat jođus sámis, ja oasálastit ságastallamiidda kultursuorggi vejolašvuođaid ja hástalusaid hárrái.
– Mii leat nu rámis go beassat almmuhit dán jagaš prográmma, gos sámi artisttat ja dáiddárat nugo Sofia Jannok, Joar Nango, Roman Yakolev, Hildá Länsman, Emil Karlsen ja ollu earát váldet oasi. VALY ljietna- ja čuovgafitnodat barget veahkkin sihkkarasttit buori kvalitehta konferánssas, dadja Christina Hætta, Sámiráđi kulturossodaga jođiheaddji.
KulturSápmi konferánssa váldoulbmil lea fállat sámi kultursuorgái gávnnadanbáikki gos beassat fierpmadagaid hukset riikarájáid rasta ja movttiidahttit eambbo ovttasbargui
– Mus lea doaivva ahte mii nágodit láhčit buori deaivvananbáikki váikko KulturSápmi lágiduvvo dán jagi digitála hámis, dadja Hætta.
Rájárastildeaddji hástalusat
Prográmmas leat maiddái “gievkkanbeavdisagastallamat” gos suorgi besset digaštallat hástalusaid mat erenomážit váihkkuhit sámi dáidda- ja kultursuorggi.– Movt váikkuha koronapandemiija sámi kultursuorggái Ruošša bealde Sámis, ja makkár doaibmabijuid berre čađahit? Lea go nášunala ja sámi kulturdoarjjaortnegat doarvái heivehuvvon sámi kultursuorggi dárbbuide ja movt sáhttit buoridit min doarjjaortnegiid? Dát leat dušše muhttin gážaldagain miad sávvat digaštallat, dadja Hætta.
Konferánsa lágiduvvo digitalalaččat ja galga dieđihit ovdagiitu neahttasiiddus www.kultursapmi.com. Konferánssas lea vejolaš geavahit sihke davvisámegiela, ruoŧa/dárogiela, eŋgelasgiela ja ruoššagiela, go mii dulkot buot daid gielaide.
