Sámiráđi girjjálašvuođabálkkašupmi geigejuvvui Hanne-Sofie Suongirii
Hanne-Sofie Suongir. Govva: Therese Norman Andersen
Sámiráđđi geigii girjjálašvuođabálkkašumi deatnulaš Hanne-Sofie Suongirii girjjiinis Emma Dilemma. Bálkkašupmi geigejuvvui vuoitái Göteborga girjemeassuin 28.9.2024. Girjji lea almmustahttán girjelágádus Iđut jagi 2023.
Girjjálašvuođabálkkašumi árvvoštallanjoavku čállá cealkámušastis, ahte Suongir lea buktán sámegielat girjjálašvuhtii ođđa šáŋŋera. Árvvoštallanjoavku atná dehálažžan, ahte 10–15-jahkásaččaide lea čállon namalassii sin ahkejovkui čujuhuvvon girji, mii váldá sin duođas. Árvvoštallanjoavku gávnnaha, ahte girji fátmmasta nuoraid hástalusaid ja dilálašvuođaid, ja seammás gieđahallá lossa fáttáid. Girji sáhttá maid veahkehit ollesolbmuid ipmirdit nuoraid jurdagiid ja eallima.
Girjji illustrašuvnnaid lea ráhkadan Nina Marie Andersen, ja árvvoštallanlávdegoddi čálláge, ahte dat heivejit hui bures dekstii. Illustrašuvnnaid ja deavstta stiilla geažil lohkkiin lea álki lohkat ja ipmirdit sisdoalu, vaikko davvisámegiella ii livččege sin eatnigiella. Dasa lassin árvvoštallit gávnnahit, ahte vuoiti hálddaša šáŋŋera bures ja dáinna girjjiin ovdánahttá sámi girjjálašvuođa ja movttiidahttá eambbosiid sihke čállit ja lohkat sámegillii – mii leage girjjálašvuođabálkkašumi ulbmil.
Suongir illuda vuostáiváldit bálkkašumi
Girječálli illuda, go aiddo sutnje leat mearridan addit bálkkašumi: -Lea stuorra gudni dan vuoitit. In livčče dán vuordán gal. Bálkkašupmi addá munnje vel eambbo motivašuvnna ja ilu joatkit čállima. Lei nu fiinnis gullat, ahte árvvoštallanjoavku atná árvvus juoidá, maid mun lean čállán. Lean hui giitevaš bálkkašumis. Mun háliidan vel giitit Iđut-lágádusa ja govvasárgu Nina Marie Andersena buori ovttasbarggu ovddas, loahpaha Suongir.
Girjelágádus Iđut lea maid ilus Suongira beales, go son lea lea ožžon bálkkašumi: - Mun háliidan sávvat Hanne-Sofiei olles min lágádusa beales ollu lihku bálkkašumi ovddas, dadjá Nan Persen Iđut-girjelágádusas.
DUOGÁŠDIEĐUT
Hanne-Sofie Suongir
Hanne-Sofie Suongir lea 34-jahkásaš girječálli, guhte lea eret Deanus, muhto orru dán áigge Finnmárkkus, Unjárggas. Son lea gazzan oahpu Tromssa universitehtas, gos son logai psykologiija. Son debuterii girječállin 2020:s girjjiin Elle, guohcamanit poastakantuvrras, mii lea almmuhuvvon maiddái dárogillii. Jagi 2022 son almmuhii mánáidgirjji Buorre idja, Sunnáš, ja 2023 son almmuhii iežas vuosttaš nuoraidgirjji, Emma dilemma. Su njealját girji lea boađi boađi ja almmustuvvá jagi 2024 loahpageahčen ovdal juovllaid.
Emma dilemma
Emma dilemma lea nuoraidgirji, beaivegirji. 14-jahkásaš Emma čállá beaivegirjji. Son lea ráhkásmuvvan, son ii dieđe maid son háliida dán máilmmis, ja sus lea skihpár gii gielista ja beahttá. Emma morašta, son váillaha iežas uhcaoappáža gii jámii fáhkka, son šattai dušše njeallje jagi, mo sáhttá Ipmil dahje universa diktit diekkár váivviid dáhpáhuvvat, manin, manin?
Sámiráđi girjjálašvuođabálkkašupmi
Sámiráđi girjjálašvuođabálkkašumi ulbmil lea movttiidahttit sápmelaččaid čállit sámegillii. Dasa lassin bálkkašupmi buktá beaggima čálliide ja dahká dovddusin sámi girjjálašvuođa. Sámiráđi girjjálašvuođabálkkašupmi juhkkojuvvo juohke nuppi jagi juogo ollesolbmuide oaivvilduvvon girjái, dahje mánáide ja nuoraide oaivvilduvvon girjái. Dán jagi bálkkašupmi addojuvvo mánáide ja nuoraide oaivvilduvvon girjái.
Sámiráđi girjjálašvuođabálkkašupmi lea juhkkojuvvon jagi 1994 rájes. Ovddit girjjálašvuođabálkkašupmi juhkkojuvvui jagi 2022 Sámiid 22. konferánssas Váhčiris, Jielleváris. Dalle bálkkašumi oaččui Sara Vuolab diktačoakkáldagainis Gárži. Bálkkašupmin girječálli oažžu 30 000 NOK ja guvssi. Dán jagáš bálkkašupmeguvssi lea duddjon Per-Stefan Idivuoma.
Lassedieđut:
Hanne-Sofie Suongir
+47 482 38 042
hanne_sofie2(at)outlook.com