Muitodilálašvuohta - sin gudnin geat dušše manadettiin Sámiid 8. konferánsii Snåasii
Sámiid 8. konferánsa Snåasas 1974. Gurutbealde: Nils-Aslak Valkeapää, Juhani Nousuniemi ja Pekka Lukkari. Guoros sajit symboliserejit sáttagotti jávkán lahtuid. Govva: Johannes Helander/Juhani Nousuniemi’s archives.
Sámeráđđi lágida 23. sámekonfereanssa oktavuođas muitoboddu sámepolitihkkáriid gudnin geat dušše go ledje mátkkošteamen 8. sámekonferánsii Snåasii. Muitoboddu ordnejuvvo lávvardaga geassemánu 20. beaivve 2026 Ohcejogas.
Avvilis vuolgán smávvagirdi jávkkai geassemánu 24. beaivve 1974 fárustis guhtta olbmo. Girdi ii leat gávdnon dán beaivvi rádjái. Girddis ledje kapteaidna ja vihtta olbmo sámi delegašuvnnas, geat galge mátkkoštit sámekonferánsii Snåasii. Mátkkošteaddjit ledje Jouni Aikio Vuohčus, Jouni J. Vest Roavvesavvonis, Reidar Suomenrinne Ohcejogas, Uula A. Länsman Áŋŋelis ja Artto Sverloff Čeavetjávrris. Kapteaidna lei Pekka Petteri Niemi Roavvenjárggas.
Sámiid 23. konferánssas muittašit 70-jagi historjjá guovddáš dáhpáhusaid ja daid oaffaruššamiid mat leat dahkkon. Dat vihtta Suoma sáttagotti ovddasteaddji ledje dehálaš jienat iežaset servodagaid siste ja oppa sámeservodagas, ja sin jávkan jagis 1974 dovdojuvvui sakka miehtá Sámi.
“Mii massiimet máŋga guovddáš olbmo, geat barge sihkkarastit sámiid vuoigatvuođaid ja nannet min servodaga. Dát váikkuhii guhká, erenoamážit Suoma beale Sámis. Dál mii hálidit bisánit muittašit dán manaheami.” Dadjá Suoma Sámiid Guovddášsearvvi ságadoalli Áslat Holmberg.
Muitobottuin 52 jagi maŋŋel girdilihkohisvuođa háliida Sámiráđđi gudnejahttit sin muittu.
Muitobottus čájehuvvo Gosa šaddet áddján -dokumeanta, man Jouni J. Vest áddjut Suvi West lea ráhkadan, ja dilálašvuhtii oassálastet sámepolitihkkárrohkiid bearrašiid ovddasteaddjit.