ON bisseha ruvkeásaheami Rönnbäckenis Västerbottenis
Preassadieđáhus Vapsten čearus ja Sámiráđis.
ON bisseha ruvkeásaheami Rönnbäckenis ja ávžžuha Ruoŧa divvut iežaset ruvkelága nu ahte dat doahttala sámiid vuoigatvuođaid eamiálbmogin; stuorát sisabahkkemat sámi guovlluin ii oaččo álggahait miehtama haga!
Historjjálaš mearrádusas sihtá ON Nállevealhanlávdegoddi ahte Ruoŧŧa bisseha ruvkeprošeavtta Rönnbäckenis Västerbottenis. Prošeakta lea ožžon olu fuomášumi ja lea garrasit vuosttalduvvon. Lávdegoddi ákkastallá mearrádusa dainna ahte ruvkeprošeakta buvtášii Vapsten čearrui nu stuorra vahágiid ahte jus prošeakta galggašii joatkit, de dat eaktudivčče čearu dohkkeheami. Dasa lassin Nállevealhanlávdegoddi nanne ahte lea maid rihkkus go Ruoŧa lágat eai diktán čearu iskat ruvkeásahanášši Ruoŧa duopmostuoluin. Konkrehtalaččat lavdegoddi gávnnaha ahte ruvkeásaheapmi rihkku Vapsten čearu opmodatvuoigatvuođa (konvenšuvnna artihkkal 5 (d) (v)) ja ahte Ruoŧa minerála- ja biraslágat rihkkot čearu vuoigatvuođa njulget mearrádusa vuoiggalaš diggeášši bokte (nu gohčoduvvon effective remedy) (konvenšuvnna artihkkal 6).
Dáid rihkkusiid ON Nállevealhankonvenšuvnna ektui, Nállevealahanlávdegodi gáibida ahte Ruoŧŧa (mearrádusa 8. teakstaoasis):
Galgá njulget ášši Vapsten čearu ektui dakko bokte ahte heaittihit ruvkelobi Rönnbäckenis dakkár proseassa bokte mii gudnejahtta čearu vuoigatvuođa friija dieđihuvvon miehtamii.
Galgá rievdadit riikka ruvkelága nu ahte dát vuhtiiváldá sapmelaččaid sajádaga eamiálbmogin ja sin vuoigatvuođaid eatnamiidda ja luondduriggodagaide, ja mas vuhtiiváldet riikakidgaskasaš stándarda friija dieđihuvvon ovddalgihte miehtamii.
Juhket dieđu Nállevealhanlávdegotti mearrádusa ektui.
Jorgalit Nállevealhanlávdegotti mearrádusa ruotagillii ja sámegillii.
Nállevealhanlávdegotti mearrádus mielddisbuktá ahte stuorát sisabahkkemat árbevirolaš sami guovlluin eai sáhte čađahuvvot sámi riekteguoddiid miehtama haga. Ruoŧa stáhta ferte aktiivvalaččat váldit ovddasvástádusa bearráigeahččat ahte dan vuoigatvuođa vuhtii váldet. Stáhta ii sáhte beare čujuhit dasa ahte čearut ja fitnodagat fertejit gávdnat ”konsensusčovdosiid”. Dasa lassin galgá Ruoŧŧa rievdadit iežas lágaid nu ahte dat addá čearuida vejolašvuođa beaktilit njulget ášši jus sin vuoigatvuođat rihkkojuvvojit.
Sáhtát dás lohkat olles mearrádusa: The CERD Committee's decision regarding Rönnbäcken case
Eanet dieđuid addiba:
Inger-Ann Omma, Vapsten čearu miellahttu, tel. +46 70-206 42 53;
Mattias Åhrén (Vapsten čearu ovddasteaddji áššis), tel. +46 70-47 37 006
