Per-Olof Nutti joatká Sámiráđi presideantan
Govva: Sámiráđđi / Piera Heaika Muotka
Sámiráđi čoahkkimis Ohcejogas, válljejuvvoi Per-Olof Nutti ovttajienalaččat joatkit Sámiráđi presideantan.
Sámiráđi vuođđudeapmi dáhpáhuvai Sámiid 23. konferánssa oktavuođas. Ođđasit válljejuvvon presideanta illuda jođihit Sámiráđi. Dál álgá bargu čađahit sámekonferánssa mearrádusaid.
– Lean giitevaš go lean ožžon luohttámuša joatkit presideantan. Okta min deháleammos bargguin dál ovddos guvlui lea čáđahit Sámiid 23. konferánssa mearradusaid ja áigumušaid, ja mis leat áibbas ođđa strategiija mas leat vuoruhuvvon bargusuorggit áigodahkii 2026-2030. Dehálaš oassi min barggus šaddá sihkkarastit ahte Sámiráđis dál olahit min strategalaš mihttomeriid. Mun illudan joatkit ovttasbargu min miellahttoorganisašuvnnaiguin ovddidan dihtii sámiid vuoigatvuođaid ja ovdánahttit Sámiráđi viidáseappot, dadjá Nutti.
Sámiid 23. Konferánsa leat válljen čuovvovaš lahtuid Sámiráđđái áigodahkii 2026-2030:
| Lahttu | Várrelahttu | Organisašuvdna |
|---|---|---|
| Áslat Holmberg | Sunná Porsanger | SSG |
| Niko Mihkal Valkeapää | Keijo Pirttijärvi | SSG |
| Ida-Maria Helander | Jouni Esa Nousuniemi | SSG |
| Niilá-Juhan Valkeapää | Jaakko Toikka | SSG |
| Sara Elvira Kuhmunen | Marie Louise Svonni Allas | BEO |
| Margareta Påve | Joakim Påve | RSÄ |
| Anders Erling Fjällås | Nils Erik Poidnakk | RSR |
| Per Olof Nutti | Gudrun Kuhmunen | RSR |
| Beaska Niillas | Vidar Andersen | NSR |
| Christina Henriksen | Beatrice Fløystad | NSR |
| Ellen-Sara Sparrok | Lars Elias Bransfjell | NBR |
| Lajla Helene Eira | Johan Dánel Turi | NBR |
| Stein Are Olsen | Ingrid Fløistad | SÁL/SFF |
| OOSMO* | ||
| GSS* |
– Lean maiddái hui rámis go mii leat nágodan ná fiina doalut lágidit Ohcejogas. Háliidan giitit olles Ohcejoga servodaga go leat nu bures válddán min vuostá. Seammás háliidan giitit sihke Sámiráđi bargiid, oasseváldiid ja ovttasbargoguimmiid, dadjá Per-Olof Nutti.
Presideantta lassin válljejuvvuiba Ellen-Sara Sparrok ja Ida Márjá Helander Sámiráđi várrepresideantan ođđa áigodahkii.
* Sámiid 23. konfereansa oaidná ahte ruošša bealde miellahttuservviid ovttasbarggu bottu sivva ii leat rievdan, ja danin doalahuvvo boddu dassái go Sámiráđđi mearrida eará. Duođalaš geopolitihkalaš dili dihtii guovllus doalahuvvojit guokte saji ja guokte várresaji Sámiráđis gaskaboddosaččat guorusin.
Sámiid 23. konfereansa bivdá Sámiráđi dađis veardidit rievdá go dilli nu ahte sáhttá fas joatkit ovttasbarggu, ja addá Sámiráđđái fápmudusa nammadit guokte lahttu ja guokte várrelahttu ruošša beal miellahttuservviid evttohusaid vuođul go dasa leat eavttut sajis.