Riikkaidgaskasaš iskkadeapmi galgá čilget kultur-sámi birgejumi korona heahtedilis
Sámiráđđi, Sámediggi Norggas, Sámi dáiddárráđđi ja Sámi Internášunála filbmainstituhtta bovdejit dál sámi dáidda- ja kultursuorggi váldit oasi oktasaš iskkadeamis mii galgá čalmmustahttit kultur-sámi birgejumi korona heahtedilis.
– Nu go muđuid ge kultureallimii, de lea korona pandemiija garrasit čuohcan maiddái Kultur-Sápmái. Seammás vásihat ahte doaibmabijut mat galget veahkehit kultureallima dán dilis, eai leat doarvái bures heivehuvvon sámi kulturbargiide ja sámi kulturinstitušuvnnaide geat barget riikkarájáidrasttildeaddji suorggis, čilge kulturossodaga hoavda Sámiráđis, Christina Hætta.
Christina Hætta dadjá ahte sii dál ballet ahte dramáhtalaš servodatgidden, riikarájáid gidden ja korona heahtedoaimmat sáhttet bissovaččat goaridit suorggi.
– Mii eat dieđe man guhká pandemiija bistá, eat ge dieđe doarvái bures movt dat váikkuha Kultur-Sápmái. Lea dehálaš midjiide gulahallat ovttaskas kulturbargiiguin ja sámi kulturinstitušuvnnaiguin vai oažžut gelbbolašvuođa movt korona heahtedilli váikkuha sidjiide ja makkár kulturpolitihkalaš strategiijaid mii dan vuođul galgat láhččet.
Sámiráđđi, Sámediggi Norggas, Sámi dáiddárráđđi ja Sámi Internášunála filbmainstituhtta sávvet oallugat servet iskkadeapmái mii álggahuvvui odne ja bistá borgemánu 17 beaivái.
– Iskkadeapmi ádjána gaskal 5-10 minuhtta, ja mii sávvat oallugat váldet áiggi muitalit movt korona dilli váikkuha sidjiide, ja buktit evttohusaid doaibmabijuide mat sáhttet sin doarjjut hástaleaddji áiggis.
