Jalvvi Niillas Holmberg oažžu Sámiráđi girjjálašvuođabálkkašumi 2026
Govva: Sámiráđđi / Piera Heaika Muotka
Sámiráđi girjjálašvuođabálkkašupmi 2026 geigejuvvo Jalvvi Niillas Holmbergii Goatnelle-romána ovddas man son lea čállán.
Niko Mihkal Valkeapää, Sámiráđi várrepresideanta
Govva: Sámiráđđi / Piera Heaika Muotka
Árvvoštallanlávdegoddi lea ovttajienalaččat mearridan, ahte Holmberg oažžu dán jagáš bálkkašumi. Árvvoštallanlávdegotti mielas lea Goatnelle románas čáppa, rikkis ja nana giella ja muitalus mii gieđahallá stuorra gažaldagaid sihke lagaš ja persovnnalaš vugiin.
Románas bohtet ovdán fáttát nugo gullevašvuohta, árbevierru, ovddasvástádus, sohkabuolvvat ja sámi vuoiŋŋalašvuohta. Váldopersovnna čađa govviduvvo sihke makkár rahčamuš lea go ferte geahččalit seailluhit kultuvrra ja giela, ja dan vuostálasvuođa man sámi nuorat sáhttet dovdat go sin ala biddjo ovddasvástádus man lea váttis guoddit.
Holmberg čállá váttes servodatlaš áššiid birra dakkár vugiin ahte lohkki illá nágoda bidjat girjji eret, seammás go addá lohkkái ođđa vugiid jurddašit eallima, máilmmi ja gaskavuođaid olbmuid, giela ja elliid gaskkas.
– Goatnelle deattuha makkár fápmu dálá áiggi girjjálašvuođas lea dáppe Sámis. Jalvvi Niillas Holmberg čállinvuohki sihke hástala, movttiidahttá ja rahpá lohkki čalmmiid, muitala Sámiráđi várreságadoalli Niko Mihkal Valkeapää.
Sámiráđi girjjálašvuođabálkašupmi juhkkojuvvui vuosttaš geardde 1994’s. Bálkašupmi juhkkojuvvo juohke nuppi jagi ja molsašuddá mánáid ja ollesolbmuid girjjálašvuođa gaskkas. Ulbmil dáinna bálkašumiin lea movttiidahttit girječálliid čállit ja almmuhit eambbo girjjálašvuođa sámegillii, ja ovddidit girjjálašvuođa mas lea alla dáiddalaš árvu. Sámiráđi girjjálašvuođabálkašupmi 2026 geigejuvvui geassemánu 17. beaivve Ohcejogas KulturSámi konferánssas.
Bálkkášumi vuoiti birra
Jalvvi Niillas Holmberg lea girječálli ja musihkkár geas leat ruohttasat Deanuleagis, Sámis. Su girjjálaš bargguin leat earret eará divttat, prosa, drámá ja filbmamánusat. Holmberg lea čállán guokte romána ja čieža diktačoakkáldaga. Son lea ovdanbuktán divttaidis miehtá máilmmi, ja su teavsttat leat jorgaluvvon máŋgga gillii.