Sámiráđđi doarju Tanzania masai álbmoga
Sámiráđđi gáibida ahte addet rivvejuvvon eatnamiid ruovttoluotta masaiaide ja ahte luitet masaia jođiheddjiid geaid leat bidjan giddagassii.
Sámiráđđái leat joavdan ilgadas ođđasat ahte dán geasi leat masaiat fámuin bálkestuvvon eret sin árbevirolaš guovlluin go leat ásahan Loliondo Game Reserve nammasaš bivdoreserváhta Tanzanias. 1500 km2 sturrosaš guovllus lea čorgen eret visot masaid geat árbevirolaččat leat geavahan eatnamiid nu ahte rikkes turisttat galget bállet joavdelasat bivdit. Lea Ovttastuvvon Arábialaš Emiráhtaid fitnodat Otterlo Business Company, mii min dieđuid mielde galgá jođihit bivddu dán guovllus. Guovllu masaiat leat massán badjel goalmmádas oasi buoremus guohtuneatnamiin. Dát lea maid veahkaválddálaččat dahkkon, eai ge leat ovddalgihtii jearran miehtama álbmogis geasa dat čuohccá.
Guovlu lea dehálaš guohtuneanan masaia álbmogii.
Dasa lassin leat 11 masaia jođiheaddjit ja 12 olbmo gullevaččat sin servodahkii lobiheamet biddjon giddagassii. Ii leamašan riekteproseassa eai ge leat dupmejuvvon. Lea čielggas ahte ná vikkahit jaskkodahttit vuosttaldemiid eatnamiid suoládeami ektui, ja vuortnohit álgoálbmotjođiheddjiid geat vigget suodjalit iežaset álgoálbmotvuoigatvuođaid guovllus.
Sámiráđđi bivdá:
1. Galgá dalán luoitit masaia álbmoga jođiheddjiid ja servodatlahttuid geat leat lobiheamet biddjon giddagassii.
2. Galgá dalán addit ruovttoluotta rivvejuvvon Loliondo Game Reserve guovlluid sidjiide geain leat árbevirolaččat vuoigatvuođat dáid eatnamiidda.
Oktavuođadieđut:
