Sámiráđi gudnebálkkašupmi Hans Ragnar Mathisenii
Govva: Sámiráđđi
Dáiddár, servodatberošteaddji ja ofelaš Hans Ragnar Mathisen, Áilo-Máhtte-Hánsa, lea ožžon Sámiráđi gudnebálkkašumi 2026. Son lea guhkes eallinbarggu bokte čájehan ođđa vuogi dasa mo Sápmi sáhttá sámi vuolggasajis áddejuvvot, tevdnejuvvot ja muitaluvvot. Bálkašupmi geigejuvvui Sámiid 23. konferánssa oktavuođas Ohcejogas.
Per Olof Nutti, Sámiráđi presideanta
Govva: Sámiráđđi / Piera Heaika Muotka
Hans Ragnar Mathisen lea iežas guhkes eallima čađa addán ollu sámi servodahkii iežas dáidagiid bokte. Govvadáiddárin, aktivistan ja servodathuksejeaddjin lea son čalmmustahttán sámi kultuvrra, historjjá, eatnama ja gullevašvuođa. Son lea nannen áddejumi das ahte Sápmi lea oktasaš guovlu mii rasttilda daid riikarájáid maid stáhtat leat bidjan.
Mathisena vuosttaš čájáhus lei čakčačájáhusas 1970’s, ja son lea dan rájes buvttahan bargguid main leat earret eará litografiijat, akvarealla govat ja eará govat main leat politihkalaš, filosofalaš ja vuoiŋŋalaš fáttát. Son lea iežas bargguid bokte čalmmustahttán sámi perspektiivvaid, ja bidjan návccaid dasa mo sámi historjá galgá muitaluvvot, ja mo sámi servodaga sáhttá áddet.
Mathisen lea earenoamážit dovddus iežas dáiddalaš Sámi kárttain. Kárttaid bokte son lea hástalan stáhtarájáid, ja dat leamaš vuolggasadjin dasa mo min guovlu dál ipmirduvvo. Son lea hábmen kártta iežamet báikenamain, iežamet hámiin, ja iežamet vuolggasajis. Sámi báikenamat leat maid čállon báikkálaš riektačállimiin, ja leat nu maiddái leamašan dehálaččat iežamet gillii, árbevirolaš máhttui, ja historjjálaš joatkašupmái.
– Hans Ragnar Mathisen lea oahpahan min oaidnit Sámi iežamet čalmmiiguin. Iežas dáidaga ja kárttaid bokte lea son čájehan makkár fápmu lea das ahte mii álbmogin beassat ieža defineret iežamet, min guovlluid ja min muitalusaid. Su eallinbargu guoskkaha Sámiráđi vuoiŋŋa ja vuođu: nannet oktavuođaid sámiid gaskka riikkarájáid rastá, dadjá Sámiráđi ságadoalli, Per-Olof Nutti.
Gudnebálkkášumi birra
Sámiráđi gudnebálkkašupmi geigejuvvo juohke njealját jagi dakkár olbmui, organisašuvdnii, searvái dahje ásahussii mii áŋgirit bargá sámi álbmoga ovddas. Bálkašupmi sáhttá geigejuvvot barggu ovddas mii lea nannen sámi servvodaga oktiigullevašvuođa, leamaš mielde seailluheame ja suodjaleamis sámi árbevieruid, eallinvuogi, jurddašanvuogi, giela, dahje barggu ovddas mii lea seailluhan ja ovddidan dáid árvvuid maiddái ođđaáigásaš servodagas.
Sámiráđi gudnebálkašupmi 2026 geigejuvvo Hans Ragnar Mathisenii - Áilo-Máhtte-Hánsii - Searvegeattis Deanus ja Romsavákkis eret. Sutnje geigejuvvo dát bálkášupmi danin go son lea máŋggaid jagiid bargan rájiid rasttildeaddji bargguin dáiddárin, aktivistan ja servodathuksejeaddjin, ja su barggu ovddas čalmmustahtit Sámi kárttaid bokte.