Sámi dáidda- ja kultursuorgi čoahkkana Anárii 20.–22.9.2023
Bajábeale govain oassi dain dáiddáriin, geat servet dán jagáš KulturSápmái.
Sámi dáidda- ja kultursuorgi čoahkkana Anárii KulturSápmi-konferánsii čakčamánu 20.–22. beivviid. Dáhpáhusa guovddážis leat sámi dáidda- ja kultursuorggi varraseamos prošeavttat, maid lassin dáhpáhusas beassat čiekŋut suorggi áigeguovdilis jearaldagaide. Dán jagáš KulturSámi temán lea duohtavuohta, seanadeapmi ja dekoloniseren. Dáhpáhussii leat dieđihan iežaset sullii 150 olbmo. Dáhpáhus lágiduvvo vuosttaš geardde Suoma bealde.
KulturSámis beassá oahpásnuvvat miehtá Sámi dáidda- ja kultursuorggi áigeguovdilis fáttáide. Prográmmas lea earret eará skenariobargobádji, mii suokkardallá, makkár livččii sámi dáidda- ja kultursuorgi dán áigge, juos koloniseren ii livčče dáhpáhuvvan. Bargobádjái servet ee. Katarina Barruk, Outi Pieski, Mary Ailonieida Sombán, Harald Gaski ja Petra Laiti. Dasa lassin dáhpáhusas beassá geahččat earret eará Suvi West ođđaseamos filmma, Máhccan. Eará dáiddárat prográmmas oktan áigeguovdilis prošeavttaideasetguin leat earret eará Jalvvi Niillas Holmberg, Auri Ahola, Lada Suomenrinne ja Sámi Dáiddačehpiid searvi. Dáid lassin Jouni Laiti, Anders Svonni ja Nils-Johan Labba servet ságastallamii garra duoji dálá dili ja boahtteáiggi birra.
Dáiddadállu rahpá KulturSámi vuosttaš beaivvi
Dáiddadállu - Sámi Artist Network searvá lágideaddjin dán jagáš KulturSápmái ja bidjá sámi dáidaga ja dáiddára vuosttaš konferánsabeaivvi guovddážii. Sii bovdejit oassálastiid deaivvadallat dáiddalaš bures boahtimiiguin ja joŧket maŋŋel gaskabeaivvi prográmma bargobájiin ja sáhkalávddiin. Bargobáji bokte šaddá vejolašvuohta digáštallat vásáhusaid ja jurdagiid, mat sáhttet badjánit iešguđet dáiddalaš oktavuođaiguin. Sáhkalávdi lea oassin Dáiddadálu Podcast -buvttadeamis ja dás beassá guldalit njeallje guovddáš dáiddadovdi, go govahallet boahtteáiggi sámi dáiddasuorggi.
Loga dáhpáhusa olles prográmma dáppe.
