Sámi álbmotbeaivvi 30 jagi ávvudeapmi
Guovvamánu 6. beaivve lea Sámi álbmotbeaivvi 30 jagi ávvudeapmi. Beaivi čalmmustahttojuvvo vuosttaš sámi riikkačoahkkima muitun mii dollojuvvui Troanddimis 1917, ja beaivi ávvuduvvui vuosttaš geardde 1993.
Sámiid 15. Konferánsa Helssegis 1992 mearridii cealkámuša bokte ahte guovvamánu 6. beaivi galggai válljejuvvot Sámi álbmotbeaivin, gudnejahttin dihte vuosttaš Sámi riikkačoahkkima mii dollojuvvui Troanddimis 1917. Mearrádusa maŋŋá ávvuduvvui de vuosttaš sámi álbmotbeaivi čuovvovaš jagi, guovvamánus 1993. Dan rájes lea ávvudeapmi viidon ja šaddan dehálaš ávvudeapmin Sámis. Beaivvi čalmmustahttin ja politihkalaš ja almmolaš beroštupmi lea sákka lassánan maŋimuš jagiid – sihke siskkobeal ja olggobeal Sámi.
Sámiráđi presideanta, Áslat Holmberg, oaivvilda ahte 30 jagi ávvudeapmi lea buorre vejolašvuohta sámi servodahkii fuomášuhttit Sámi álbmotbeaivvi dehálašvuođa.
– Sámi álbmotbeaivi symbolisere sámi álbmoga nanusvuođa ja searvevuođa. Sámi álbmotbeaivi lea beaivi gos beassat gudnejahttit min rikkes historjjá, kultuvrra, ja min vieruid. Mii beassat čohkket návccaid vai sáhttit joatkit suodjalit ja nannet iežamet servodaga, dadjá Holmberg.
Vuosttáš Sámi álbmotbeaivi ávvuduvvui seammá áigge go Ovttastuvvon Nášuvnnaid Eamiálbmotjahki rahppui 1993. Muđui dat ávvuduvvui máŋga sajiin miehtá Sámi.
– Ledjen dušše 4 jagi boaris go Sámi álbmotbeaivi vuosttáš háve ávvuduvvui. Dan rájes lea min gilis šaddan árbevierrun ávvudit Sámi álbmotbeaivvi ovttas Ohcejohkalaččaiguin ja Sirbmálaččaiguin, ja dát čájeha min álbmoga oktasašvuođa riikarájáid rastá. Iežan árbevierru lea ges maŋemuš jagiid šaddan ávvudit beaivvi Johkamohki márkaniin. Dán beaivái mun illudan juohke jagi, joatká Holmberg.
Sámiráđđi sávvá buohkaide lihkku sámi álbmotbeivviin ja ávžžuha buohkaid searvat báikkálaš sámi álbmotbeaidoaluide!
Sámiráđi birra:
Sámiráđđi lea sápmelaččaid oktasaš sorjjasmeahttun kulturpolitihkalaš ja politihkalaš ásahus, mii doaibmá Norgga, Ruoŧa, Ruošša ja Suoma sámiid organisašuvnnaid oktasašbargoorgánan. Vuođđudeami rájes jagis 1956 Sámiráđđi lea aktiivvalaččat bargan sámepolitihkalaš figgamušain. Sámiráđđi lea okta dain eamiálbmotorganisašuvnnaiguin, mii lea doaibman buot guhkimusat.
Sámekonferánsa lea Sámiráđi alimus orgána ja dasto Sámiráđi deháleamos forum, ja mearrádusaid mielde galgá dat lágiduvvot juohke njealját jagi. Konferánssa virggálaš sáttagoddi leat Sámiráđi miellahttoorganisašuvnnaid ovddasteaddjit, oktiibuot 72 sáttaolbmo ruoŧa, suoma, norgga ja ruošša miellahttoorganisašuvnnain, 18 sáttaolbmo juohke riikka juhkosis.