Sámiráđđi almmuha ohcan láhkai bissovaš virggi gulahallanráđđeaddin
Mii ohcat olbmo gii sáhttá doaimmahit Sámiráđi gulahallanbargguid. Dása gullet sihke siskkáldas ja olgguldas gulahallan. Mii ohcat olbmo gii lea bures hárjánan geavahit iešguđetge ođđaáigásaš gulahallanreaidduid ja lea ovdamunni jus máhttá muhtin veardde gráfalaš ovdanbuktima. Teknihkalaš dáiddut deattuhuvvojit. Virgi eaktuda ahte bures dovdá sámi servodaga. Galgá maid bures máhttit sihke iešheanálaččat bargat ja ovttasbargat earáiguin.
Rájáhis geahččanguovlu lea vuođđojurddašeapmi mii gullá olles Sámiráđi doibmii. Nu maiddái ovttasbargu eará álgoálbmogiiguin. Dát eaktuda ahte bargit doibmet viidát.
Ámmátlaš gelbbolašvuohta
Eai leat čávga gáibádusat.
Gielladáidu
Virgi gáibida ahte ohcci hálddaša sámegiela lassin ovtta davviriikkalaš váldogielain. Ohcci galgá maid bures hálddašit eŋgelasgiela čálalaččat.
Eará gelbbolašvuohta
Diehtu Sámi servodaga birra deattuhuvvo. Dasa lassin deattuhat fágalaš gelbbolašvuođaid, ovttasbargo- ja gulahallandáidduid, dás maid čálalaš ovdanbuktindáiddu. Mii ohcat maid olbmo gii lea iešheanálaš, mearrediđolaš ja doaimmalaš.
Muđuid
Virgi lea bissovaš. Bálká, bargobáiki ja álgin šiehtadusa mielde.
Eanet dieđuid virggi ektui addá váldočálli Áile Jávo, tlf. +47 950 25 926.
Ohcamuš oktan mildosiiguin sáddejuvvo Sámiráđđái e-boasttain saamicouncil@saamicouncil.net maŋimusát 23.11.2022.
