Sámiráđđi bovde sámi dáidda- ja kultursuorggi Anárii 20.–22.9.2023
Sámiráđđi bovde sámi dáidda- ja kultursuorggi Anárii 20.–22.9.2023. KulturSápmi lea oktasaš Sámi deaivvadanbáiki juigiide, duojáriidda, dáiddáriidda, kulturbargiide ja kulturásahusaide.
Dáiddárat jagi 2022 KulturSápmi-dáhpáhusas Váhčiris, Jielleváris.
KulturSápmi lágiduvvo dál njealját geardde ja dán jagi dat lea vuosttamuš geardde Suoma bealde. Dáhpáhusa ulbmil lea hábmet ságastallanbáikki, hukset fierpmádagaid ja oktavuođaid ja lassin movttiidahttit ovttasbargat ain eanet riikkarájiid rastá ja maiddái oahpásnuvvat sámi áigeguovdilis dáidda- ja kulturprošeavttaide. Dáhpáhusa váldolágideaddji lea Sámiráđđi ja ovttasbargoguoimmit leat Ijahis idja, Viermie K., Dáiddadállu, Lásságámmi, Norgga sámediggi, Ruoŧa sámediggi, Dáidaga ovddidan-guovddáš (Taike) ja Davviriikkaid ministtarráđđi.
- KulturSápmi lea šaddan min dáidda- ja kultursuorgái hirbmat dehálaš ja vuogas deaivvadanbáiki, gos mii dovdat ruovttus ja gos sáhttit ain joatkit oahpásnuvvat nubbi nuppiin ja digaštallat áigeguovdilis áššiin, dadjá Sámiráđi kulturossodaga hoavda Christina Hætta.
Prográmmas dáidda- ja kulturprošeavttaid ovdanbuktimat, panelaságastallamat ja oktasaš eahketdoalut
Dán jagáš KulturSámi fáddán lea duohtavuohta, seanadeapmi ja dekoloniseren. Dáhpáhusa dárkilis prográmma almmustahtto geasi mielde, muhto dego ovddit jagiid, dáhpáhusas beassá oahpásnuvvat áigeguovdilis dáidda- ja kulturprošeavttaide ja guorahallat dehálaš fáttáid panelaságastallamiin.
- Duohtavuođa- ja seanadanproseassat leat dál jođus Sámis ja Norgga bealde leage aitto komišuvdna almmustahttán raportta. Dát proseassat rahpet vejolašvuođaid kultur-Sápmái digaštallat das, mii Sámi dáidda- ja kultursuorgi livččii leamašan, jus dáruiduhttin ii livčče dáhpáhuvvan. Scenario-jurddašeami bokte mii áigut geahččalit kártet, makkár árvvuid ja eavttuid mielde galgá boahtteáiggis doarjut sámi dáidda- ja kultursuorggi, gávnnaha Hætta.
Nuvttá idjadansadji ja borran, go dieđiha iežas maŋemustá suoidnemánu 9. beaivve
KulturSámi dieđiheapmi lea dál rahppojuvvon. Sávaldat lea, ahte oassálastit dieđihit iežaset dáhpáhussii maŋemustá 9.7. 2023.
- Dieđiheapmi lea álgán ja oallugat leat juo čájehan beroštumi searvat min dáhpáhussii. Olbmot berrejit dieđihit iežaset maŋimustá 9.7., vai sihkkarastet alcceseaset nuvttá idjadansaji ja borramiid. Dáhpáhussii sáhttá dieđihit iežas KulturSámi neahttasiidduin čujuhusas www.kultursapmi.com, loahpaha Hætta ja sávvá oaidnit oallugiid Anáris čakčamánus.
Lassedieđut:
