Sámiráđđi lea ilus Lappi gearretrievttu duomuin
Sámiráđi presideanta Åsa Larsson Blind lea ilus go Suoma Lappi gearretriekti lea áššehuhttán sámi guollebivdiid, geat ledje áššáskuhttojuvvon lobihis bivddus Deanu oalgejogain Ohcejogas ja Veahčajogas.
- Gearretrievtti duopmu lea nu čielggas, ahte sáhttá adnojuvvot beanta oahppogirjin sámiid vuoigatvuođaid vuhtiiváldimis, cealká Larsson Blind.
Sámiráđi presideanta vuordá, ahte Suoma eiseválddit váldet Lappi gearretrievtti duomu vuhtii, ja gudnejahttet sámiid vuoigatvuođaid geavahit kultuvrraset ja bivdit árbevirolaš vuogi mielde.
Son vuordá maid, ahte Suoma ráđđehus atná duomu muittus ovddos guvlui, vaikko lea gal vurdojuvvon ahte áššáskuhtti eiseváldi guoddala duomu Suoma Aliumusriektái.
Lappi gearretriekti hilggui buot sivahallamiid Deanu njealji sámi guollebivdi vuostá, geat ledje áššáskuhttojuvvon lobihis bivddus oalgejogain Veahčajogas ja Ohcejogas diibmá. Duomus cealká Gearretriekti, ahte guolástanláhka, mii moadde jagi dás ovdal nuppástuhttojuvvui, rihkku riikkaidgaskasaš olmmošvuoigatvuođaid soahpamušaid, maid Suopma lea geatnegas čuovvut ja mat dáhkidit sámiide álgoálbmogin rievtti geavahit iežaset kultuvrra.
Gearretriekti cealká, ahte guollebivdit geat ledje áššáskuhttojuvvon lobihis bivddus Veahčajogas, eai leat rihkkon lága, dasgo sis lea riekti guolástit jogas. Duomus lohká ahte guolásteapmi gullá áššáskuhttojuvvon sápmelaččaid soga árbevieruide Veahčajogas. Maiddái lohká, ahte Veahčajoga luossanáli gođđudilli lea stáđis.
Gearretriekti hilggui maiddái áššáskuhttima guollebivdi vuostá, gii Ohcejogas bivddii luossafirpmiin ráfáidahttináigge. Lappi gearretriekti cealká, ahte stáhtaráđi ásahus oanidii luossabivddu Ohcejogas borgemánus ja ráddjii sámiid árbevirolaš fierpmebivddu. Duomus lohká ahte sámiid bivdu lea ráddejuvvon Suoma vuođđolága 17 paragráfa vuostá. Gearretriekti cealká, ahte Ohcejogas ii leat dárbu bivdoráddjehusaide borgemánus.
Lappi gearretrievtti mielde stáhtaráđi ásahus rihkku sihke Suoma vuođđolága ja sámiid álgoálbmotvuoigatvuođaid maid olmmošvuoigatvuođaid soahpamušat dáhkidit.
Sámiráđi presideanta Åsa Larsson Blind ávžžuha Suoma ráđđehusa lohkat duomu dárkilit, ja vuordá ahte ráđđehus dál ođđasis ja vuđolaččat árvvoštallá Suoma ja Norgga gaskasaš Deanu soahpamuša. Sámiráđđi lea ovdalis cuiggodan Deanu soahpamuša, go dat duolbmá sámiid bivdovuoigatvuođaid Deanus ja dan bokte maiddái rihkku riikkaidgaskasaš olmmošvuoigatvuođaid soahpamušmearrádusaid.