Sámiráđđi ávžžuha globála rievdadusaide
COVID-19 ealáskahttindoaimmain, Sámiráđđi ávžžuha buot ráđđehusaid, riikkaidgaskasaš lágádusaid ja fitnodagaid gudneáŋgiris rievdadusaide čuovvovaš 30 jagis.
– Dát galget leat suvdilis ja ruoná rievdadusat, mat máhcahit min dillái, gos fas eallit goaritkeahttá luonddubirrasa. Muđui mis lea ovddabealde heahtedilli, man bálddas COVID-19 pandemiija orru fal smávva hehttehus, dadjá Sámiráđi presideanta, Christina Henriksen.
Sámiráđđi lea fuolas COVID-19 dávdda váikkuhusain eamiálbmogiidda, go olu eamiálbmotservošiin miehtá máilmmi leat váilevaš vejolašvuođat beassat buori dikšui. Eiseválddit fertejit vuoruhit dán dili buorideami, daid riikkain gos eamiálbmogat orrot. Vaikko COVID-19 oidnojuvvo eanáš dearvvašvuođakriisan, dat lea maid čájehan dehálaš áššiid olles servodagas.
– Dát pandemiija lea čájehan máilbmái, mo mii sáhttit rievdat, go oaidnit hohpolaš dárbbu. Buohkat mii juogadit ovddasvástádusa, muhto earenomážit máilmmi jođiheaddjit ja fitnodagat galget stivregoahtit min suvdilis boahtteáiggi guvlui, dadjá presideanta.
Sámiráđđi lea fuolas, ahte ealáskahttindoaimmaiguin máilbmi máhccá fas oanehisáigge jurddašanvuohkái, mii vuođđuduvvá luonddubirrasa goarideapmái.
– Eamiálbmogiid jurddašanvuogi mielde dalle go váldá juoidá, ferte maid addit ruovttoluotta. Ferte geahččat guhkás boahtteáigái ja árvvusatnit dan, mo buot eallin lea čatnon oktii. Dál, eanet go goassige ovdal, mii fertet loktet dán viisodaga, dadjá Henriksen.
Ovdal eat sáhttán jurddašitge dan maid dál leat dahkan – gidden min ekonomiijaid pandemiija njoazideami dihtii. Birra máilmmi mii oaidnit dan váikkuhusaid: buhttásut čázit gos mearraeallit mannet guovlluide, gos eai leat ovdal oidnon; buhttásut áimmu geažil várrečohkat oidnojit čuđiid kilomehteriid duohkái, gosa eai ovdal oidnon; stuorragávpogat besset návddašit buhttásut áimmus go girdi- ja biilajohtolaga nuoskkideapmi lea geahppánan.
– Dát leat dat jođánis váikkuhusat, maid olbmo čalmmiiguin oaidnit. Mii sáhttit fal govahallat, makkár oaidnemeahttun váikkuhusat das lea, go luonddubiras beassá bosihit.
