Tonje Margrete Winsnes Johansen lea virgáduvvan ođđa mielbargin Árktalaš ja birasossodagas.
Sámiráđđi lea virgádan Tonje Margrete Winsnes Johansena Gussanjárggas Lágesvuonas eret ođđa mielbargin min Árktalaš ja birasossodagas. Johansen galgá erenoamášit bargat dálkkádat ja birasáššiiguin ja dainna mo Árkttálaš guovlluin sáhtašii suvdilis servodatovdánahttin.
Sámiráđđi lea virgádan Tonje Johansena mielbargin Árktalaš ja birasossodagas gos son galgá bargat ovttas Gunn-Britt Retteriin.
Johansen lea mearrasámi gilážis Gussanjárggas eret, muhto ássá dál Guovdageainnus. Son lea masterdásis lohkan stáhtadieđu NTNU:s Tråantes. Masterdutkosis son lea guorahallan statistihka riidduin mat leat čátnon luondduriggodagaide álgoálbmotguovlluin. Sámiráđi barggu bokte Johansen galgá deattuhit dálkkádatrievdademiid ja suvdilis ovdáneami Árktalaš guovlluin.
– Oahppu čađa lean deattuhan sosiála ovdáneami ja sohkabealigažaldagaid, ja mu mielas lea ovttasdoaibman suvdilis servodatovdánahttima ja luonddu geavaheami gaskkas hui miellagiddevaš. Danin illudan dáid áššiiguin bargat Sámis, dadjá Johansen.
