Govven: Carl-Johan Utsi
Sámiráđi girjjálašvuođabálkkašupmi geigejuvvui Sara Vuolabii Sámi 22. konferánssas
Sámiráđi girjjálašvuođabálkkašupmi geigejuvvui Sara Vuolabii Sámi 22. konferánssas Váhčiris sotnabeaivve 14.8.2022. Girjjálašvuođabálkkašupmi juhkkojuvvui Vuolaba diktačoakkáldahkii Gárži. Diktačoakkáldaga lea almmustahttán Čálliid lágádus jagi 2019.
Girjjálašvuođabálkkašumi árvvoštallanlávdegoddi čállá ákkastallamiinnis, ahte Vuolab gieđahallá diktačoakkáldagastis fáttá, mii ii leat ovdal gieđahallojuvvon sámi girjjálašvuođas. Diktačoakkáldat gieđahallá borranváttu, man váikkuhusat leat divttaid guovddáš temá ja dat, mot váddu čuohcá olbmui ollislaččat, sihke rumašlaččat ja silolaččat. Vuolab čalmmustahttá divttainis dávdda, mii lea losses fáddá, sihke divtta hállái ja olles su bearrašii.
Sara Vuolab illuda bálkkašumi oažžumis. - Lea hui stuorra illu ja gudni oažžut girjjálašvuođabálkkašumi. Lea somá, ahte árvvoštallanlávdegoddi oaidná árvvu mu čállosiin ja háliida bálkkašumi bokte leat veahkkin loktemin ja čalmmustahttimin čállosiid ain eanet. Mun lean nu ilus, lohká Vuolab.
Árvvoštallanlávdegoddi čállá maid, ahte Sara Vuolab diktačoakkáldat lea buorre ovdamearka das, mot dáidaga bokte sáhttá govvidit eallima váttes ja váivves áššiid, ja liikká lohkkis lea dovdu, ahte son lea ožžon oasi eallima čábbodagas. Vuolab diktačoakkáldat heive sihke nuoraide ja ollesolbmuide.
Čálliid lágádusa doaimmaheaddji John Trygve Solbakk sávvá lihku čállái. - Mun anán bálkkašumi stuorra árvvus. Sámiráđi girjjálašvuođabálkkašupmi lea dehálaš sámi girjjálašvuhtii ja mun jáhkán dat movtttiidahttá olbmuid čállit sámegillii. Bálkkašumis lea sihkkarit stuorra mearkkašupmi eandalii nuorra čállái. Mun sávan lihku Sarai Čálliid lágádusa bealis, lohká Solbakk.
Sámiráđi girjjálašvuođabálkkašumi ulbmil lea movttiidahttit olbmuid čállit sámegillii. Dasa lassin bálkkašupmi buktá beaggima čálliide ja dahká dovddusin sámi girjjálašvuođa. Girjjálašvuođabálkkašupmi juhkkojuvvo vurrolagaid mánáid- ja nuoraidgirjái dahje rávesolbmuide oaivvilduvvon girjái. Jagi 2022 girjjálašvuođabálkkašupmi juhkkojuvvui rávesolbmuid girjái. Bálkkašupmi juhkkojuvvo guovtti jagi gaskkaid ja dan juohkimis mearrida árvvoštallanlávdegoddi. Ovddit bálkkašupmi juhkkojuvvui jagi 2020, goas dan oaččui Kirste Paltto girjjiinis Luohtojávrri oainnáhusat.
Ovddit girjjálašvuođabálkkašumiid oainnát dáppe.
Sara Vuolab
Sara Vuolab lea 27-jahkásaš čálli ja son lea eret Kárášjogas Gámehisnjárggas. Vuolab lea čađahan girječálli oahpu “Čális fal”, mas son almmustahtii antologiijačoakkáldaga “Diet almmái ii hála das maidege” (2019). Su vuosttaš girji “Gárži” almmustuvai moadde mánu dan maŋŋá ja vuittii jagi 2021 tabubálkkašumi.
Vuolab lea lohkan maid bátnedivššároahpu, muhto ii bargga dál dan suorggis.
Girjjálašvuođabálkkašupmi
Sámiráđi girjjalašvuođabálkkašumi ulbmil lea movttiidahttit olbmuid čállit sámegillii. Bálkkašupmi buktá beaggima čállái ja dahká sámi girjjálašvuođa dovddusin. Girjjalašvuođabálkkašumi álgogiella galgá leat sámegiella. Unnitlogu sámegillii jorgaluvvon girji sáhttá goit maid dohkkehuvvot. Bálkkašupmi geigejuvvo juohke nuppi jagi ja molsašuddá gaskal mánáidgirjji ja ollesolbmogirjji.
Sámiráđi girjjalašvuođabálkkašumit 1994–2020
| Jahki | Girji | Girječálli | Govvideaddji |
|---|---|---|---|
| 1994 | Mu ustibat | Iraida Vinogradova | Peter Popov |
| 1994 | Šerres beaivi | Elvira Galkina | Jakov Jakovlev |
| 1995 | Juohkásan várri | Olavi Paltto | |
| 1996 | Hoŋkoŋ dohkká | Ulla Pirttijärvi | |
| 1997 | Ii fal dan dihte | Inghilda Tapio | Ulrika Tapio |
| 1998 | Jåvvå | Gun Aira/ Ingegaard Vannar | Aino Hivand |
| 1999 | Bearralat Deatnogáttis | Eino V. Guttorm | |
| 2000 | Biehtár ja Duommá jávren stulliba | Stig Riemmbe Gælok | Kjell Ove Storvik |
| 2002 | Čiežain čáziin | Harald Gaski | Lars Nordström |
| 2003 | Árbbolaččat, nubbi oassi | Jovnna-Ánde Vest | |
| 2004-2005 | Čábbámus iđitguovssu | Elle Márjá Vars | Trygve Lund Guttormsen |
| 2006 | Meahci šuvas bohciidit ságat | Synnøve Persen | |
| 2007 | Máilmmi láikkimus olmmoš | Elle Márjá Vars | Harald Aadnevik |
| 2009 | Lihkkošalmmái | Rauni Magga Lukkari | |
| 2011 | Sárá beaivegirji | Siri Broch Johansen | Bjørg Monsen Vars |
| 2014 | Amas amas amasmuvvat | Niillas Holmberg | Antti Väre |
| 2016 | Mun lean čuoigi | Siri Broch Johansen | |
| 2018 | Áhčči min | Rauni Manninen | |
| 2020 | Luohtojávrri oainnáhusat | Kirste Paltto | Sunna Kitti |