ALMMUHEAPMI: BÁLKÁHUVVON OAHPAHALLI VIRGGIT    

Sámiráđđi ja Suoma Sámi Nuorat ohcet golbma oahpahalli bargat 100% virggiin Interreg prošeavttas “Filling the EU-Sápmi knowledge gaps”. Mii virgádat ovtta oahpahalli guhtege riikii; Suomas, Norggas ja Ruoŧas. Bargobáiki lea ovtta Sámiráđi doaimmahagain.Oahpahallit ožžot praktihkalaš vásáhusaid prošeakta čađaheamis ja ožžot maid vejolašvuođa buorebut oahpásmuvvat bargovugiide maid Sámiráđi geavaha go ovddida sámi áššiid iešguđet EU ásahusain ja muđuid sámi áššiid ovddideames riikkaidgaskasaččat ja riikkaid dásis.Barggu sisdoallu vuolgá das makkár bargosuorgái don válljejuvvot. Sáhtát ovdamearkka dihtii bargat čuovvovaš surggiiguin: EU, olmmošvuoigatvuođat, árktalaš ja biras dahje kultuvra.

Maid oahpahalliprográmma fállá dutnje?

Oahpahalliprográmma fállá erenoamáš buori skuvlejumi ja vásáhusa buohkaide geain lea áigumuš ja beroštupmi boahtteáiggis bargat eamiálbmotrivttiiguin ja sámiide guoski áššiiguin riikkaidgaskasaččat EU:s, ON:s ja Árktalaš Ráđis.

  • Vejolašvuođa praktihkalaččat geavahit iežat akademalaš máhtu.

  • Vejolašvuođa háhkat mávssolaš bargovásáhusa.

  • Áddejumi sámi organisašuvnnaid bargovugiin ja proseassain.

  • Vejolašvuođa viiddidit iežat fierpmádaga Sámis.

  • Vejolašvuođa oassálastit sámi bargobirrasis.

  • Vejolašvuođa oassálastit EU eamiálbmogiid gulahallančoahkkimii Brusselis 2021.

Makkár sisdoallu lea oahpahalli virggis? 

Váldobargguide gullet earret eará:

  • Doarjut prošeavtta oppalaš čađaheami

  • Doaimmahit iešguđetge lágan bargguid Sámiráđi ossodagain.

  • Ordnet deaivvademiid, bargobájiid ja kurssaid ja maiddái oassálastit daidda.

  • Dutkat, hábmet, čállit ja divodit áššebáhpiriid, raporttaid ja gulaskuddamiid.

  • Oahpahalli galgá áigodaga maŋŋá doaimmahit oahpahalliraportta.

Maid mii vuordit dus?

  • Rabas lahkonanvuogi sámi, EU ja riikkaidgaskasaš áššiide.

  • Beroštumi oahppat sámi- ja eamiálbmotbargovugiid.

  • Miela bargat riikkarájiid rasttildeaddji birrasis.

  • Movtta oassálastit organisašuvnna beaivválaš bargguide.

  • Iešheanalašvuođa.

  • Ahte čatnasat oahpahallibargui olles áigodahkii.

Áigodat

Bálkáhuvvon oahpahalliprográmma álgá ođđajagimánu 1. beaivvi 2021 ja bistá skábmamánu 30. beaivái 2021.

Bagadallit

Juohke oahpahállái nammaduvvo bagadalli muhtin Sámiráđi ossodagain. Bagadalli galgá oahpistit oahpahalli dihto bargguid bokte, muhto maiddái oppalaččat Sámiráđi bargguin. Oahpahallit ožžot bargguid ja ovddasvástádusaid mat ain leat áigeguovdilat.

Gii sáhttá ohcat?

  • Sápmelaš guhte háliida bargat sámi guoskevaš áššiiguin iešguđetge lágan dilálašvuođain.

  • Oahpahalliprográmmas ii leat ahkerádji.

  • Lea ovdamunnin jus ohccis lea diehtu ja máhttu sámi servodagas ja erenoamážit EU ja riikkaidgaskasaš oktavuođain. Buorre ovttasbargoattáldagat, gulahallančehppodat, buorre čállindáidu ja iešheanalašvuohta maid deattuhuvvo. Gáibiduvvo ahte ohccis bures hálddaša sihke sámegiela ja eŋgelasgiela, sihke čálalaččat ja njálmmálaččat.

  • Oahpahalliprográmma lea rabas sápmelaččaide geat lea gazzamin oahpu dahje leat juo geargan oahpuiguin ja geat háliidit bargat sámi áššiiguin EU konteavsttas.

Mo ozat?

Ohcamušas galggat deavdit elektronalaš ohcanskovi ja čállit reivve gos čilget iežat beroštumi. Reive galgá leat eŋgelasgillii ja eanemustá okta siidu. Dat galgá čilget du duogáža, vejolaš bargovásáhusaid ja eará mii dagahivčče ahte don heivešit bures dán virgái. Reivves galgá maiddái boahtit ovdan manin leat beroštuvvan oahpahalliprográmmas ja makkár surggiin leat erenoamášit beroštuvvan.

Málle: ohcanskovvi oahpahalliprográmmii

Ozat dán ohcanskovi bokte:

Eanet dieđuid addá prošeaktajođiheaddji Niila Inga: