Anna-Marja Persson lea virgáduvvon ođđa prošeaktajođiheaddjin Sámiráđi Árktalaš- ja Birasossodagas
Sámiráđđi lea virgádan Anna-Marja Perssona guhte lea eret Bååhnes Mátta-Sámis. Son galgá bargat prošeaktajođiheaddjin min Árktalaš- ja Birasossodagas.
Sámiráđđi lea virgádan Anna-Marja Perssona prošeaktajođiheaddjin Árktalaš- ja Birasossodagas. Doppe son galgá bargat ovttas Gunn-Britt Retteriin. Persson lea Bååhnes eret, muhto ássá dál Tromssas. Sus lea Masteroahppu guliid ja meahcceelliid hálddašeamis, ja Bacheloroahppu ealliid buresbirgejumis ja etologiijas.
– Lean riegádan ja bajásšaddan boazodoallubearrašis Ruoŧabealde Mátta-Sámis, nu ahte luondduhálddašeapmi lea álo leamašan dehálaš oasis mu eallimis. Dál illudan bargagoahttit dáid áššiiguin Sámiráđis, dadjá Anna-Marja
Anna-Marja Persson lea prošeaktajođiheaddjin “Njeaššeeatnamat Samis” prošeavttas, mii lea oassin stuorát prošeavttas man namma lea “Arctic Wetlands Ecosystems – Resilience through restoration stewardship”. Sámegillii dát šattašii “Árktalaš njeaššeeana ekovuogádagat - dávggešvuohta divudeami biigodeami bokte”. Ulbmil prošeavttain lea loktet máhtolašvuođa mo njeaššeeatnamat geavahuvvojit ja suddjejuvvojit boazodoalloguovlluin. Sámiráđđi galgá jođihit das prošeakta oasi man namma lea “Indigenous uses and stewardship of wetlands ecosystems”. Prošeakta lea oassin Árktalaš Ráđi Conservation of Arctic and Fauna (CAFF) bargojoavkkus.
Son galgá maid bargat prošeavttain mii guorahallá mo dálkkádatrievdadeamit váikkuhit eatnamiid ekovuogádagaid.
