Christina Henriksen válljejuvvon Sámiráđi ođđa presideantan
Guovvamánu 23. beaivvi válljejuvvoi Christina Henriksen ovttajienalaččat Sámiráđi presideantan. Henriksen váldá badjelasas doaimma maŋŋá Åsa Larsson Blind, guhte lea jođihan Sámiráđi 2017 rájes gitta dássážii.
“Munjje lea stuorra gudni go Sámiráđđi lea mu válljen jođhit Sámiráđi boahtte Sámekonferánssa rádjai, mii lea 2021as. Vuollegašvuođain válddán badjelassan barggu, go Åsa ja dat ovddeš presideanttat leat issoras buori barggu bargan organisašuvnna jođihemiin ja huksemiin mu ovdal”
Henriksen lea Girkonjárggas eret ja lea guhká bargan iešguđet Sámi organisašuvnnaid bokte. Lea muđui oahpaheaddji ja 2018 rájes lea son leamaš Sámiráđi várrepresideanta ja bargolávdegotti lahttu. Bargolávdegottis čohkkájit dál earret Henriksen, Åsa Larsson Blind, Áslat Holmberg ja Ivan Matrehkin.
Henriksenis lea viiddis hárjáneapmi Sámepolitihkkálaš bargguiguin. Earret eará sisabahkken-, vuoigatvuođaáššiin ja kultursuorggis. Lea maid guhká bargan riikkaidgaskaš dásis ja erenoamážit álgoálbmogiiguin ruoššabeal rájáid.
– Mun illudan ovttasbargagoahtit min miellahttoservviiguin ja muđui sámi servodagain ovddidit Sámi vuoigatvuođaid ja álgoálbmotvuoigatvuođaid, sihke dáppe Sámis ja maiddái riikkaidgaskasaččat, loahpaha Henriksen.