Diehtu doarjjavuostáiváldiide

Asta Balto, Petra-Biret Magga-Vars ja Oskar Östergren Njajta

Sámiráđđi ii boađe gáibidit ruovttoluotta máksit prošeakta- ja mátkedoarjaga doaluide ja doaimmaide mat leat šluhttejuvvon dahje maŋiduvvon koronavirusa geažil. Jus leat ožžon kulturdoarjaga Sámiráđis muhto koronavirusa geažil šadde rievdadusat, de galggat dan čilget raporttas ja rehketdoalus. Jus dárbbašat maŋideami de sáhtát ohcat dan e-boastta bokte gos oanehaččat čilget siva ja ohccojuvvon ođđa prošeaktaáigodaga. Dát guoská maiddái bargostipendii.

Mii dohkkehat gokčat buot juolluduvvon goluid vaikko doaimmat eai leat čađahuvvon dahje jus leat maŋiduvvon koronavirusa geažil. Dát guoská buot bušeterejuvvon goluide sihke plánemii ja čađaheapmái, omd. golut artisttaide. Buot goluid gálga duođaštit rehketdoalus ja raporttas nu go gáibiduvvo kulturdoarjaga njuolggadusain.

Sámiráđđi válda duođalaččat eiseváldiid rávvagiid corona virusa hárrái ja leat šluhtten čoahkkimiid ja mátkiid ovddasguvlui. Bargiin leat ruovttukantuvrrat, muhto leat deaivamis eboastta ja telefuvnna bokte.