Gursa EU márkana, sámi ealáhusaid ja fitnodatdoalu birra
Sámiráđi ja Suoma Sámi Nuoraid searvvi Filling the EU-Sápmi knowledge gaps prošeakta, ovttas Johkamohki Sámi oahpahusguovddážiin, bovde gursii EU siskkáldas márkana, sámi ealáhusaid ja fitnodatdoalu birra. Dat lea guovtti beaivvi gáiddusgursa njukčamánu 24.-25. beivviid, 2021.
EU fállá máŋggaid vejolašvuođaid ovddidit ođđa vugiid fitnodatdolliide. Dán gurssa ulbmiljoavkun leat sámi fitnodagat, fitnodatdoaimmit ođđa fitnodatjurdagiiguin, ja earát geat háliidit diehtit mo EU márkan sáhttá rahkadit vejolašvuođaid Sápmái márkanastit min buktagiid dego biepmu, kultuvrra, filmmaid, designa, teknologiija ja eambbo.
Gurssas beasat háhkat máhtu vejolaš EU doarjjaortnegiid birra ja makkár ulbmilat EUs leat fitnodatdoimmiid ja fitnodagaid ektui. Gursa boahtá maid veahkehit hukset fierpmádaga sámi fitnodagaide ja hábmet ođđa vejolašvuođaid ovttasbargat suorggis.
Oasseváldit sáhttet vuordit aktiivvalaš oahpahusbirrasa fátta birra mii sáhttá orrut váttis ja vuordit heivehuvvon gelbbolašvuođahuksema EU márkana birra sámi konteavsttas.
- Mii sávvat ahte gursa čátná oasseváldiid ja dahkkiid gaskkas geat sáhttet veahkehit laktit sámi buvttademiid EU márkanii, dadjá EU-ossodaga jođiheaddji, Elle Merete Omma.
- Mii leat oaidnán ahte dat eai leat nu ollu sámi fitnodagat geat doaimmahit buvttademiid EU:ai ja dat lea suddu danne go mii jáhkkit ahte EU márkan sáhttá buktit árvolassáneami Sápmái. Mis leat earenomáš buvttadusat Sámis ja ovdamunit dego ráinnas biepmu, luondu, earenomáš historjá ja kultuvra, ja dat ánssášit márkanastojuvvot min iežamet eavttuid mielde vai dat buktet rehálaš ja guoddevaš ekonomalaš ovdaneami Sápmái, Omma lasiha
Gurssas bohtet leat sihke joavkobarggut ja movttiidahtti logaldallamat EU politihka fitnodagaid ja márkaniid birra ja digitála márkanastima birra.
- Mii háliidit ahte oasseváldit ožžot konkrehta reaidduid ja neavvuid vai besset ovdánahttit sin fitnodagaid. Ja go lea gáiddus hámis de sávvamis lea álkit sámi fitnodagaide searvat danne go eai ferte mátkkoštit, earenomážit dán pandemiija dilis, Omma loahpaha.
Dulkon fállojuvvo davvisámegillii ja dáro- dahje ruoŧagillii.
PROGRÁMMA - EU MÁRKAN GURSA
Vuosttaš beaivi - gaskavahkku, njukčamánu 24. beaivi (Norgga/Ruoŧa áiggis)
08:30 Searvva gursii
09:00 Bures boahtin ja álgosánit
09:10 Sámi fitnodatdoaibma Are Smuk Figved
Boddu 10 min
10:10 EU ásahusat ja ulbmilat. Mo sáhttá fitnodatdoaibma beaggát Árktalaš guovllus? Kristel Jurado, Eurohpa Komišuvdna
11:00 Beavdeságastallan
12:00 Boradanboddu
13:00 EU-Interreg ja riikaidgaskkasaš ovttasbargu. Stáhtadoarjjanjuolggádusat ja maid jurddášit unna dahje gaskamahtosaš (SME) fitnodahkan EU siste Iiris Mäntyranta ja Jonas Wasserman, Norrbotten leatnastivra
Boddu 10 min
14:10 Viiddidit EU márkanii - sávaldagat ja vuorjašumit Andreas Lidström ja Kajsa Fjellström
15:00 Loahpaheapmi
Nubbi beaivi - Duorastat, njukčamánu 25. Beaivi (Norgga/Ruoŧa áiggis)
08:30 Searvva gursii
09:00 Digitála márkanastin Joakim Hampus, Digitála jođiheaddji, Nexer Maverick
12:00 Boradanboddu
13:00 Almmuhuvvo fargga
14:00 Vásahusat friija beassamis EU márkaniidda árktalaš ja eamiálbmot geahččanguovllus Mininnguaq Kleist, Ruonaeatnama ovddastusa jođiheaddji
14:45 Loahpahan ságastallan
15:00 Gurssa loahpaheapmi
ALMMUHEAPMI LEA RABAS!
