Petra Laiti lea virgáduvvon ođđa mielbargin Sámiráđi olmmošvuoigatvuođaossodahkii
Govven: Heikki Isotalo
Sámiráđđi lea virgádan Petra Laiti – Mihku Ilmára Mika Petra, Anáris eret, prošeaktamielbargin olmmošvuoigatvuođaossodahkii.
Sámiráđđi lea virgádan Petra Laiti prošeaktamielbargin prošeavttas “Just transition in Sápmi” olmmošvuoigatvuođaossodagas. Laiti lea Anáris eret, muhto ássá dál Helssegis. Sus lea masteroahppu ja bacheloroahppu jođihan ja organisašuvdnaoahpuin.
"Just transition in Sápmi'' lea guoktejahkásaš prošeakta mii čalmmustahttá dálkkádatvuoiggalašvuođa árbevirolaš sámi guovlluin davviriikkain. Prošeaktaguoimmit leat Sámiráđđi ja Amnesty International riikkadássásaš ossodagat: Amnesty International Suopma, Amnesty International Norga ja Amnesty International Ruoŧa (dás maiddái Amnesty Sápmi, mii lea searvi Amnesty Ruoŧas mii čalmmustahttá sámi vuoigatvuođaid).
– Petra Laiti lea guhká áŋgiruššan sihke sámi siviilaservodagas ja rikkaidgaskkasaš álgoálbmotovttasbarggus. Son lea maid aktivista ja sámiid beales guovddáš sátneguoddi Suoma servodatdigaštallamis. Mii leat hui ilus go beassat ávkkástallat su nana gelbbolašvuođain dán prošeavttas, dadjá Sámiráđi váldočálli Áile Jávo.
Laiti lea golbma áigodaga leamaš jođiheaddjin Suoma Sámi Nuorain. Son lea ovdal bargan kulturveahkeruđaiguin Nordisk Kulturkontaktis, ja dovdá maiddái Sámiráđi bures ovdalaččas go son lea doaibman Sámiráđi lahtun 2022 rájes.
– Mun nu illudan searvat Sámiráđi bargui ja viimmatge beassat ollisáigásaččat bargat sámiid rájiid rastildeaddji ovttasbargguin”, dadjá Petra Laiti,
– Dálkkádatvuoiggalašvuohta lea okta sámeservodaga buot áigeguovdileamos hástálusain, ja lea issoras dehálaš, ahte Amnestyt leat searvan ovttasbargoguoibmin dán prošektii, loahpaha Laiti.