Sámi prošeakta nuppádis nammaduvvon Regiostars Awards gilvui
Filling the EU-Sápmi knowledge gaps prošeakta lea nuppádis nammaduvvon Regiostars gilvaleddjin. Dán jagi lea Regiostars 15. ávvujahki ja dan gudnin gilvvus leat fárus 15 iešguđet prošeavtta mat leat leamašan juogo finalisttat dahje vuoitit 15 jagi áigge.
Geahča ođđa filmma prošeavtta birra ráhkaduvvon Regiostars Awards oktavuođas.
Regiostars bálkašupmi lea Eurohpá kommišuvnna guovlu- ja gávpotpolitihka oaiveossodaga jahkásaččat ordnen gilvu. Dan ulbmilin lea čalmmustahttit buriid ovdamearkkaid regionála ovdánahttimis ja čájehit EU-ruhtaduvvon prošeavttaid main leat innovatiiva ulbmilat ja sáhttet inspireret eará regiovnnaid ja prošeavttaid. Prošeakta lei 2021:as mielde Vuoiggalaš Eurohpá: Vealaheami vuostásaš doaimmaid ja searvadeami ovddideapmi -kategoriijas (FAIR Europe: Fostering inclusion and anti-discrimination).
“Mii leat nu rámis ahte leat nammaduvvon nuppádis. Dat čájeha ahte min prošeakta lokte dehálaš áššiid EU ektui ja ahte sii leat fuomášan dan. Dál mii sávvatge ahte olbmot dorjot min ja jienastit min prošeavtta, dadjá prošeavtta jođiheaddji Åsa Larsson Blind.
Åsa Larsson Blind, prošeavtta jođiheaddji
Mo sáhtát veahkehit min vuoitit:
Álmmolaš jienasteapmi lea rabas gitta 15 skábmamánnui čujuhusas www.regiostarsawards.eu. Jienastat prošeavtta go deaddilat boalu “I vote for my favourite projects”. Siidu jearrá du epoastačujuhusa mainna duođaštat du jiena ja dan maŋŋá beasat addit jiena prošektii.
Enni Similä and Anja Márjá Nystø Keskitalo searvaba ávvudoaluide 17. skábmamánu 2022 Évoras, Portugalis.
Similä ja Keskitalo ovdanbuvttiiga prošeavtta Interreg dáhpáhusas Youth4Cooperation gos soai čalmmustahttiiga prošeavtta váikkuhusaid nuoraide. Anja Márjá muitalii lihkostuvvan oahpahalliprográmmas ja das makkár vejolašvuođaid dat fálai sutnje earenomážit bargoeallimis.
Enni Similä and Anja Márjá Nystø Keskitalo ovdanbuvttiiga Filling EU-Sápmi knowledge gaps Interreg jáhkasaš dáhpáhusas Brusselis golggotmánus 2022.
Mii livččiimet hui giitevaččat juo sáhtášeiddet doarjut min dán gilvvus ja jienastit min prošeavtta!
Prošeakta loahpahuvvui čakčamánus 2022 ja beasat lohkat maŋimuš bohtosiid min 8. ođasreivves. Prošeavtta ruhtadedje Interreg Nord, Lappi Lihttu, Sámediggi Norggas, Romssa ja Finnmárkku fylkkagielda, Region Norrbotten ja Region Västerbotten.
