Sámi Váikkuhanprográmma
Háliidatgo nannet gelbbolašvuođa ovddidit sámi áššiid riikkaidgaskasaččat ja nationála dásis, ja oažžut praktihkalaš hárjáneami organisašuvdnabargguin Sámis? De lea dát váikkuhanprográmma dutnje!
3 bálkáhuvvon virggi, 1 jagi 100%
Interreg ruhtadan prošeakta ReCap ASáp: Regaining capacity in a changing Sápmi ohcá 3 oasseváldi jagi váikkuhanprográmmii. Virggiide ohcat olbmo norggabealde, ruoŧabealde ja suomabealde. Dát golbma virggi leat ollesáiggis, ja bistet 12 mánu. Okta oasseváldi válljejuvvo guđege riikkas: Suomas, Norggas ja Ruoŧas.
Maid váikkuhanprográmma fállá?
Dát prográmma addá erenoamáš oahpu buohkaide geat boahtteáiggis jurddašit bargat álgoálbmotvuoigatvuođaiguin, ja sámi ja álgoálbmotáššiiguin natioinála dahje riikkaidgaskasaš dásis EUs, ONs ja Árktalaš Ráđis. Prográmma lea hábmejuvvon ovddidit sámi geahččanguovllu.
Prográmma oasseváldit ohppet sámi servodaga birra, ožžot oahpu váikkuhanbarggus ja geavatlaš hárjáneami organisašuvdnabargguin. Prográmma addá maiddái vejolašvuođa oahpámuvvat dasa mo Sámiráđđi, Suoma Sámiid Guovddášsearvi ja eará sámi organisašuvnnat ja institušuvnnat barget gažaldagaiguin sihke riikkaidgaskasaččat ja našuvnnalaččat.
Prográmma fállá:
oahpahusa sámi servodagas, rájiidrasttideaddji ovttasbarggus ja sámi organisašuvdnabarggus,
vejolašvuođa sajáiduhhttit akademalaš teoriija geavahussii,
vejolašvuođa oažžut mávssolaš bargovásáhusa,
ipmárdusa sámi organisašuvnnaid proseassain ja politihkas,,
vejolašvuođa hukset fierpmádaga Sámis,
vejolašvuođa veahkehit sámi bargobirrasa beaivválaš bargguiguinn.
Maid mii vuordit dus?
rabasmielat lahkoneami sámi gažaldagaide sihke našuvnnalaččat ja riikkaidgaskasaččat;
beroštumi oahppat sámi ja álgoálbmogiid bargovugiin;
dáhtu bargat riikkarájárasttildeaddji birrasis;
áŋgiris miela veahkehit sámi organisašuvnnaid beaivválaš bargguin;
áŋgiris láhkkonavuogi bargguide;
geatnegasvuođa oassálastit váikkuhanprográmmii olles 1 jagi áigodahkii.
Geavatlaš dieđut
-
Bargobáikki válljet ovttas oasseváldiiguin. Sáhttá leat ruoktakántuvra lassin muhtun Sámiráđi dahje SSG kántuvrasajiin. Virgái gullet mátkkit.
Leat guokte mentora geat barget ollesáiggis váikkuhanprográmmain. Mentorat bagadit prográmmaoasseváldiid dan iešguđet bargguin čađa ja sáhttet maiddái heivehit ovttaskkas bargobihtáid prográmmas.
-
Virgi bistá ovtta jagi, čačamánu 1. beaivve 2024 rájes gitta borgemánu 31. beaivve 2025 rádjái. Oasselástit ožžot bálkká prográmmaáigodagas.
-
Sámit geat háliidit bargat sámi organisašuvnnaiguin ja áššiiguin. Ii leat ahkerádji searvat váikkuhanprográmmii.
Máhttu sámi servodaga birra, ja erenoamáš hárjáneapmi sámi organisašuvnnaiguin, lea ovddamunnin. Oasseválddiin galggašedje buorit ovttasbargo- ja gulahallannávccat, buorre čállinmáhttu ja dáidu bargat iešheanalaččat. Buorre eaŋgalasgiela máhttu, sihke čálalaš ja njálmmálaš, lea eaktun. Máhttu muhtun sámegielas lea ovdamunnin.
Mo ohcat?
Ohcanáigemearri lea miessemánu 12. beaivi. Ohcamis lea mielde motivašuvdnareive. Reive galgá leat čallojuvvon eaŋgalasgillii, eanemustá siidu, ja das galgá boahtit ovdan iežat duogáš, ovddeš bargohárjáneapmi, oahppu ja eará gelbbolašvuođat mat gullet virgái. Reivves galggat čilget manne don leat beroštuvvan virggis, makkár erenoamáš beroštumit dus leat ja mo don áiggut geavahit váikkuhanoahpu maŋŋá go leat geargan prográmmaiin.
Sádde ohcama čujuhussii: asa@saamicouncil.net
Eanet dieđuid prográmma birra oaččut prošeaktajođiheddjis, Åsa Larsson Blindis:
+46 702 543 356 dahje asa@saamicouncil.net
Sámiráđđi lea Suoma, Norgga, Ruošša Federašuvnna ja Ruoŧa sámi organisašuvnnaid eaktodáhtolaš ja iešráđálaš kulturpolitihkalaš ja politihkalaš ovttasbargosearvi.
Sámiráđi váldoulbmilin lea gohcit sámiid vuoigatvuođaid ja beroštumiid oktan álbmogin, ja nannet sámiid oktiigullevašvuođa riikkarájáid rastá oktan álbmogin. Sámiráđđi bargá maiddái riikkaidgaskasaččat sápmelaččaid ja eará eamiálbmogiid beroštumiid ja vuoigatvuođaid ovdii. Sámiráđis leat njeallje temáhtalaš ossodaga: Árktalaš – ja birasáššiid ossodat, olmmošvuoigatvuođaossodat, kulturossodat ja EU ossodat.