Sámirađđi almmuha ohcanláhkai ollesáiggi virggi prošeaktajođiheaddjin

Sámiráđđi ohcá prošeaktajođiheaddji prošektii: Climate Impacts on Terrestrial Ecosystems (CITE). Prošeavtta váldoulbmil lea nannet boazodoalu heivehaneavttuid jahkodagaid ja jahkasaš rievdamiidda. Prošeakta lea buvttadeamen reaiddu mii sáhttá addit buoret áddejumi dálkki ja dálkkádaga birra, ja dálkkádatváikkuhusain boazoguohtunguovlluin. Prošeakta lea juo leamašan jođus muhtin áigge, ja lea čađahuvvon pilohtadutkan mas vuođđun lei oktasaš máhttobuvttadeapmi gaskal boazodolliid ja dutkiid. Gávdnojit dárkilis raporttat barggus.

• Barggu sisdoallu:

  Sihkkarastit prošeavtta ovdáneami ja čađahit doaimmaid mearriduvvon prošeaktaplána vuođul. Dasa gullet maid koordineret ja ovttasbargat eará oassálastiiguin prošeavttas, nu go ásahuvvon boazodolliid geahččaladdanjoavku ja dutkanjoavku mii lea čadnon prošektii.

• Ámmátlaš gelbbolašvuohta:

  Virgái ohcat olbmo gii bures dovdá boazodoalu, ja áinnas geas lea hárjáneami prošeaktabarggus ja/dahje geas lea oahppu allaskuvllas/universitehtas unnimusat bachelor dahje sullasaš dásis.

• Gielladáidu:

  Virgi gáibida erenoamáš buorre dáiddu eŋgelasgielas, erenoamážit čálalažžat. Sámegielmáhttu deattuhuvvo, ja ohcci galgá dasa lassin máhttit ovtta davviriikkalaš váldogielain.

• Eará gelbbolašvuohta:

  Dáidu bargat iešheanalaččat ja ulbmillaččat deattohuvvo erenoamážit, ja ahte olmmoš lea iešheanálaš, diđolaš ja áŋgir. Dasa lassin deattuhat ahte ohcci dovdá sámi servodaga, erenoamážit boazodoalu, ahte lea fágalaš gelbbolašvuohta ja ovttasbargo- ja gulahallandáidu, dás maid čálalaš ovdanbuktindáidu. Vásáhusat dutkamis dahje árbedieđu geavaheamis máhtolašvuođa buvttadeami oktavuođas lea ovdamunni.

• Ohcan ja muđuid:

  Prošeakta lea oassi Sámiráđi ollislaš barggus ja prošeaktajođiheaddji galgá leat oassin bargojoavkkus mii bargá Árktalaš- ja birasáššiiguin.

  Sávvat ahte bargis lea vejolašvuohta jođánit álgit ja prošeaktabargu bistá 31.12.2024 rádjai.

  Bálká ja bargosadji šiehtadusa mielde.

  Eanet dieđuid virggi ektui addet Sámiráđi Árktalaš- ja birasossodaga jođiheaddji Gunn-Britt Retter, tel. +47 994 90 344, ráđđeaddi Susanna Israelsson, tel. +46 730 463 271 dahje Sámiráđi váldočálli Áile Jávo, tel. +47 950 25 926.

  Ohcamuš oktan mildosiiguin sáddejuvvo Sámiráđđái saamicouncil@saamicouncil.net

  maŋimustá 31.10.2023.

Sámiráđđi lea Suoma, Norgga, Ruošša Federašuvnna ja Ruoŧa sámi organisašuvnnaid eaktodáhtolaš ja iešráđálaš kulturpolitihkalaš ja politihkalaš ovttasbargosearvi.

Sámiráđi váldoulbmilin lea gohcit sámiid vuoigatvuođaid ja beroštumiid oktan álbmogin, ja nannet sámiid oktiigullevašvuođa riikkarájáid rastá oktan álbmogin. Sámiráđđi bargá maiddái riikkaidgaskasaččat sápmelaččaid ja eará eamiálbmogiid beroštumiid ja vuoigatvuođaid ovdii. Sámiráđis leat njeallje temáhtalaš ossodaga: Árktalaš – ja birasáššiid ossodat, olmmošvuoigatvuođaossodat, kulturossodat ja EU ossodat.