Sámiráđđi almmuha Sámi Duodji -mearkka ovdamearkalisttu
Sámi gálvomearkkat -prošeavtta oktavuođas lea dahkkon ovdamearkalisttu, man ulbmilin lea álkidahttit árbevirolaš duoji meroštallama. Listu lea hábmejuvvon ovttas Sámi Duodji liseansakantuvrraiguin: Duodjeinstituhtain, Sámi Duodji Sameslöjdstiftelsen:iin ja Sámi Duodji rs:iin.
Sámi Duodji -mearkka sáhttá geavahit dujiide, main leat árbevirolaš ávdnasat, hápmi, teknihkka dahje geavahus vuođđun. Sámi Duodji -mearkka ektui leat dihto gáibádusat ja ovdamearkalistu lea hábmejuvvon vai lea álkit meroštallat makkár lea árbevirolaš duodji. Duojit galget duddjojuvvon bures, vai dat bistet ja girdet dábálaš geavaheami. Sámi Duodji liseansakantuvrrat Ruoŧas, Norggas ja Suomas meannudit Sámi Duodji ohcamušaid ja boahtit geavahit ovdamearkalisttu ávkin meannudanprošeavttain.
- Danin go duodji lea ealás ja álo rievdamis de dan ii sáhte defineret. Danin mii, ovttas Sámi duodji ásahusaiguin ja servviiguin, mearrideimmet hábmet listtu mii addá ovdamearkkaid duodjái ja dainna lágiin álkida barggu diehtit makkár buktagiidda sáhttá bidjat Sámi Duodji mearkka. Listu, seamma go duodji, boahtá rievdat dárbbuid ja áiggi mielde, muitala sámi gálvomearkkaid prošeaktajođiheaddji Reetta Tornensis.
Gálvomearkka rievdademiid ja digitaliseremiid geažil, fertejit olbmot, geain lea boares Sámi Duodji -mearka ohcat ođđasit, vai ožžot ođđa Sámi Duodji -mearkka. Boares Sámi Duodji -mearkka ii oaččo geavahit jagi 2023 maŋŋel.
- Jus hálidat oažžut Sámi Duodji -mearkka dan jagi, ávžžuhit sáddet ohcamuša juo dál, liseansakantuvrrat bohtet meannudit ohcamušaid čakča- ja golggotmánus, hástala Tornensis.
Sámi Made ja Sámi Duodji -mearkkat almmustahttojuvvojedje mannan jagi loahpas. Sámi Duodji -mearka váldojuvvui atnui 1980-logus, muhto lea dál ođasmahtton. Sámi Duodji -mearka duođašta ahte buktaga lea duddjon sápmelaš ja ahte dat lea eakti duodji. Lassin gálvomearkavuogádagas lea nubbi mearka, Sámi Made, mii lea ođđa gálvomearka. Dán sáhttá geavahit ođđaáigásaš buktagiidda, maid lea ráhkadan dahje ráhkadahttán sápmelaš dahje sámi fitnodat.
- Gálvomearkkaid ulbmil lea eastadit fake-dujiid ja lasihit sámi fitnodagaid gilvofámu stuorit márkaniin. Sámiráđđi meannuda Sámi Made ohcamušaid oktii mánus, loahpaha Tornensis.
Gávnnat ovdamearkalisttu čujuhusas dáppe.
