Sandra Marja West jođihišgoahtá Sámi gálvomearkkat -prošeavtta
Sámiráđđi lea virgádan Sandra Márjá West Sámi gálvomearka -prošeavtta jođiheaddjin. Sámiráđđi almmustahttá juovlamánus ođasmahtton Sámi Duodji -mearkka ja ođđa Sámi Made -mearkka.
- Duodji lea dehálaš oassi min kultuvrras, ja mu mielas lea diehttelas, ahte mii sámit ieža beassat suddjet ja ovdánahttit iežamet kulturárbbi. Máŋgasiin lea beroštupmi oastit sámi duoji ja eará sámi buktagiid, muhto olggobeale olbmuide lea dávjá váttis dovdát eakti duoji ja maid buktagiid lea buvttadan sápmelaš. Danin gálvomearkkat leat nu dehálaččat, dadjá prošeaktajođiheaddji Sandra Márjá West.
Govva: Ørjan Marakatt Bertelsen
West lea doaibman festiválajođiheaddjin riikkaidgaskasaš Riddu Riđđu -eamiálbmotfestiválas. Dasa lassin sus lea nana duodjegelbbolašvuohta. Son lea vázzán sihke garra- ja dipmaduodji Sámij åhpadusguovdásjis Johkamohkis. Sus lea maiddái fágareive gollečeahppin. Dasa lassin West lea lohkan ruoššagiela ja Ruošša historjjá bachelora.
Sámi Duodji lea árbevirolaš sámi duoji gálvomearka ja Sámi Made lea ges mearka eará sámebuktagiidda. Gálvomearkkaid ulbmil lea addit oastái dieđu, ahte buktaga lea duddjon sápmelaš dahje sámi fitnodat ja dieinna lágiin nannet sámi ealáhusaid gilvofámu.
West vuosttaš bargu lea ráhkkanit Sámi gálvomearkkaid almmustahttimii, mii dáhpáhuvvá juovlamánus 2022. Dan maŋŋil prošeavtta váldoulbmil lea márkanfievrridit mearkkaid Sámis. Sámiráđđi oaivvilda, ahte dat lea dehálaš lávki joatkkabargui.
- Jus mii galgat lihkostuvvat gálvomearkkaiguin, de dat eaktuda, ahte sápmelaččat geavahišgohtet mearkkaid. Dušše dainna lágiin mii nákcet hukset legitimitehta mearkkaide turisttaiguin ja eará ostiiguin Sámi olggobealde. Sámi gálvomearkkat leat dehálaš servodatprošeakta, oaivvilda Sámiráđi kulturossodaga hoavda Christina Hætta.
Sámi gálvomearkkat -prošeavtta leat ruhtadan Amerihká ambassádat Ruoŧas, Suomas ja Norggas. Prošeavtta ovttasbargoguoimmit leat Sámi Duodji Suoma bealde, Sámi Duodji/ Sameslöjsstiftelsen Ruoŧa bealde, Duodjeinstituhtta ja Sámi Duodji Norgga bealde.
Lassedieđut:
Sandra Márjá West
Prošeaktajođiheaddji
+47 93408355