Sámiráđđi jugii giđa 2023 ruovtturesideansastipeanddaid
Sámiráđi kulturlávdegoddi lea juohkán giđa 2023 ruovtturesideansastipeanddaid. Stipeanddat ledje juohkin láhkai oktiibuot vihtta. Ruovtturesideansastipeandda ožžo Simon Issát Marainen (girjjálašvuohta), Heidi Gauriloff (girjjálašvuohta, dáidda, giella), Gáddjá Haarla Pieski (lávdedáidda), Anthoni Hætta (musihkka) ja Lena Viltok (duodji). Stipeanda lea 50.000 NOK.
Ruovtturesideansastipendii bohte oktiibuot 23 ohcamuša. – Mii oaččuimet valjis hui buriid ohcamušaid, man dihte kulturlávdegottis lei váttis mearridit daid juohkimis. Ohcamušaid stuorra mearri muitala, ahte Sámis leat fállun unnán bargostipeanddat. Dán dihte dat leat dehálaččat. Mun illudan, go ruovtturesideansa lágiduvvo fas boahtte jagi, gávnnaha Sámiráđi kulturlávdegotti lahttu Mary Sarre.
Ruovtturesideansa lágiduvvo digitála hámis boahtte giđa 1.3.–31.5.2023. Ruovtturesidensii sáhttá oassálastit gos ihkinassii, muhto doppe galgá leat buorre neahttaoktavuohta. Ruovtturesideanssas dáiddárat čoahkkanit gáiddusin oktasaš ságastallamiidda ja ovdanbuktit iežaset bargguid. Ruovtturesideanssa ulbmil lea fállat sámi dáidda- ja kultursuorgái vejolašvuođaid čiekŋut dáiddasuorggi bargguide ja seammás láhčit vejolašvuođa bargat kreatiivvalaš servošis ovttas eará dáiddáriiguin. Sámiráđi ruovtturesideansastipeanddaid ruhtada Davviriikkaid ministtarráđđi. Boahtte jagi eará kulturdoarjagat, dahjege bargostipeanddat ja prošeaktadoarjagat gieđahallojuvvojit easka jagi 2023 álgogeahčen.
Lassedieđut:
Unna-Maari Pulska
Kulturčálli
+ 358 44 555 3897