Oza Sámiráđis stipeandda ruovtturesidensii
Sámi duojárat, dáiddárat ja kulturbargit miehtá Sámi sáhttet dál ohcat Sámiráđis stipeandda ruovtturesidensii giđđii 2023. Ohcanáigemearri lea 14.11.2022.
Sámiráđis sáhttá dál ohcat stipeandda ruovtturesidensii giđđii 2023. Ruovtturesideanssat eai lágiduvvo juohke jagi.
Háliidit nannet dáiddáriid barganvejolašvuođaid
Ruovtturesideansa stipeanddaid ulbmil lea fállat sámi dáidda- ja kultursuorgái vejolašvuođa čiekŋut kreatiivvalaš bargguide ja seammás láhčit vejolašvuođa bargat kreatiivvalaš oktasašvuođas ovttas sámi eará kulturbargiiguin.
- Sámis leat hirbmat unnán vejolašvuođat bargostipeanddaide. Bargostipeanddat leat dehálaččat min kulturčehpiide, vai sii besset vuoruhit áiggi bargamii ja buvttadeapmái. Sámiráđđi háliida ruovtturesideanssain nannet dáiddáriid ja kulturbargiid barganvejolašvuođaid, gávnnaha Sámiráđi kulturčálli Unna-Maari Pulska.
Digitála ruovtturesideansa
Ruovtturesideansa lágiduvvo giđđat 2023 ja dat bistá oktiibuot golbma mánotbaji gaskal 1.3.–31.5.2023. Sámiráđđi juohká ruovtturesideanssaide oktiibuot vihtta 50.000 NOK sturrosaš stipeandda. Resideansa ollašuhttojuvvojuvvo digitála hámis, mas oasseváldit hábmejit oktasašvuođa ságastallamiid ja ovdanbuktimiid bokte. Ruovtturesideansa sáhttá leat ruovttus, duoddaris dahje gos ihkinassii, muhto doppe galgá leat neahttaoktavuohta. Ruovtturesideansa ii lágiduvvo juohke jagi.
Resideansa nanne oktasašvuođa riikkarájiid rastá
Pulska muitala, ahte sii lágidit ruovtturesideanssa dál nuppes. Vuosttaš geardde dat lágiduvvui 2021. Sii ožžo ovddit resideanssas buori máhcahaga oasseváldiin. Dalle dasa serve Carola Grahn (dáidda), Ingir Ane Bål (filbma), Sami Ásllat Laiti (duodji), Valentina Sovkina (árbediehtu) ja Vitaly Sapelnikova (duodji).
- Ovddit ruovtturesideanssa oasseváldit muitaledje, ahte sii gártet dávjá bargat akto. Sii gávnnahedje, ahte lei movttiidahtti beassat juogadit jurdagiid ja plánaid resideanssas earáiguin, geat ipmirdedje kreatiivvalaš barggu ja proseassa. Sii ovdanbukte nubbi nubbái iežaset bargguid neahttadeaivvademiin ja besse ovddidit bargguideaset oktasaš ságastallamiid bokte, muitala Pulska.
Hástet maid nuoraid ohcat mielde
Pulska muitala, ahte sii háliidit ruovtturesideanssain nannet maiddái sohkabuolvvaid gaskasaš oktavuođa sámi kultursuorggis. Sii sávvet, ahte maiddái nuorra dáiddárat, duojárat ja kulturbargit ohcet ruovtturesidensii. Resideansa lea oaivvilduvvon badjel 18-jahkásaččaide. Ruovtturesideanssa ja eará kulturdoarjagiid jahkái 2023 sáhttá ohcat Sámiráđi neahttasiidduin 14.11.2022 rádjái. Doarjagiid juohkimis mearrida Sámiráđi kulturlávdegoddi.
Lassedieđut ja gulaskuddamat:
Unna-Maari Pulska
Sámiráđi kulturčálli
+358 44 555 3897
unnamaari(at)saamicouncil.net