Sámirađđi almmuha ohcanláhkai gaskaboddosaš prošeaktavirggi

Mii ohcat prošeaktabargi gii sáhttá bargat ođđa prošeavttain man namma lea "Gender talks in Sápmi". Prošeavtta ulbmilin lea ovddidit servodatdigaštallama Sámis dásseárvvu birra, ja bargat ulbmillaččat fáttáin ovdamearkka dihtii digaštallanforaid ja logaldallamiid bokte. Prošeakta galgá maiddái addit buoret máhttovuođu doaibmabijuide mat sáhttet lasihit dásseárvvu Sámis, ja čalmmustahttit dutkandárbbuid dásseárvvu suorggis.  Virgi eaktuda ahte dovdá sámi servodaga.

Rájáhis geahččanguovlu lea vuođđojurddašeapmi mii gullá olles Sámiráđi doibmii. Nu maiddái ovttasbargu eará álgoálbmogiiguin. Dát eaktuda ahte bargit doibmet viidát.

• Ámmátlaš gelbbolašvuohta:

  Eai leat čavga gáibádusat, muhto hárjáneapmi prošeaktabarggus lea ovdamunnin.

• Gielladáidu:

  Sámegielgelbbolašvuohta deattuhuvvo, ja ohcci ferte lassin hálddašit ovtta davviriikkalaš váldogielain. Ohcci berre maid hálddašit eŋgelasgiela.

• Eará gelbbolašvuohta:

  Dáidu bargat iešheanalaččat ja ulbmillaččat deattohuvvo erenoamážit. Dasa lassin deattuhat fágalaš gelbbolašvuođaid, ovttasbargo- ja gulahallandáidduid, dás maid čálalaš ovdánbuktindáidu.

• Ohcan ja muđuid:

  Virgi lea ollesáiggi virgi. Sávvat ahte bargis lea vejolašvuohta jođánit álgit ja prošeaktabargu bistá 31.10.2025 rádjai.

  Ohccit Ruoŧa, Suoma dahje Norgga bealde Sámis leat bures boahtin ohcat. Bálká ja bargosadji šiehtadusa mielde.

  Eanet dieđuid virggi ektui addá Sámiráđi váldočálli Áile Jávo, tel. +47 950 25 926.

  Ohcamuš oktan mildosiiguin sáddejuvvo Sámiráđđái saamicouncil@saamicouncil.net

  maŋimustá 20.11.2023.

Sámiráđđi lea Suoma, Norgga, Ruošša Federašuvnna ja Ruoŧa sámi organisašuvnnaid eaktodáhtolaš ja iešráđálaš kulturpolitihkalaš ja politihkalaš ovttasbargosearvi.

Sámiráđi váldoulbmilin lea gohcit sámiid vuoigatvuođaid ja beroštumiid oktan álbmogin, ja nannet sámiid oktiigullevašvuođa riikkarájáid rastá oktan álbmogin. Sámiráđđi bargá maiddái riikkaidgaskasaččat sápmelaččaid ja eará eamiálbmogiid beroštumiid ja vuoigatvuođaid ovdii. Sámiráđis leat njeallje temáhtalaš ossodaga: Árktalaš – ja birasáššiid ossodat, olmmošvuoigatvuođaossodat, kulturossodat ja EU ossodat.