Sámiráđđi almmuha prošeaktadoarjaga sámi siviilaservodahkii!

Sámiráđđi almmuha ruđaid ohcan láhkai sámi organisašuvnnaide ja aktevrraide mat háliidit čađahit prošeavttaid ja doaimmaid mat nannejit sámi siviila servodaga.

Sámiráđđi bovde sámi organisašuvnnaid, ásahusaid ja eará siviila servodatoassálastiid ohcat doarjaga prošeavttaide ja doaimmaide mat huksejit kapasitehta ja nannejit sámi servodateallima, máhttu ja kultuvrra.

---

OHCANÁIGEMEARRI: MIESSEMÁNU 20. B. 2025 

---

Govva: Sámiráđđi / Piera Heaika Muotka

Doarjjaortnega birra

Doarjjaortnet galgá nannet sámi siviilaservodaga. Doarjja addojuvvo prošeavttaide ja doaimmaide viđa fáddásuorggis:

1. Eamiálbmotnuoraid nannen - deaivvadeamit ja máhttofievrrideapmi buolvvaid gaskkas

2. eamiálbmogiid iešmearrideapmi, riidoeastadeapmi ja ráfi ovddideapmi

3. Dearvvašvuohta, eallinárvu ja álgoálbmogiid biebmovuogádagat

4. Luondduárbbi suodjaleapmi ja eatnamiid ja guovlluid hálddašeapmi

5. Eamiálbmotdáidda ja -gielat

Sámiráđđi movttiidahttá erenoamážit prošeavttaid main lea rájáhis geahččanguovlu ohcat doarjaga. Juohke prošeakta sáhttá oažžut gitta 40.000 NOK doarjaga.

Gii sáhttá ohcat?

Sámi organisašuvnnat, aktevrrat, eaŋkilolbmot, joavkkut dahje fierpmádagat mat barget sámi servodateallima, vuoigatvuođaid ja kultuvrra nannemiin sáhttet ohcat doarjaga. Doaibmabidju galgá boahtit sámi siviilaservodahkii buorrin ja dávistit ovtta dan viđa fáddásuorgái.

Praktihkalaš dieđut

• Ohcanáigemearri: miessemánu 20. b. 2025 

• Prošeakta ferte leat čađahuvvon ovdal juovlamánu 31. b. 2025

• Gáibiduvvo eaŋkalis raporta ja rehketdoallu maŋŋá go prošeakta lea loahpahuvvon

• Oza doarjaga dás 

Sámiráđi váldočálli Áile Jávo vástida gažaldagaid doarjjaortnega birra, tel. +47 950 25 926.