Sámiráđđi almmustahttá Sámi Duodji ja Sámi Made -mearkkaid
Sámiráđđi almmustahttá guokte sámi gálvomearkka. Mearkkaid ulbmil lea nannet sámi duoji ja kreatiiva ealáhusaid gilvofámu. Sámi Duodji -mearka lea ođasmahttojuvvon, man dihte dat almmustahttojuvvo dál ođđasit. Dása lassin boahtá maid ođđa sertifiserenmearka, Sámi Made.
Govas gurut bealde ođasmahttojuvvon Sámi Duodji -mearka ja olgeš bealde ođđa Sámi Made -mearka.
Sámi Duodji ja Sámi Made leat guokte iešguđet sertifiserenmearkka, maid ulbmil lea gaskkustit oastiide dieđu, guđe dujiid ja buktagiid lea duddjon sápmelaš. Sámiráđđi vásiha, ahte sámi duodjái ja buktagiidda lea stuora beroštupmi, muhto oastiide lea váttis diehtit guđe buktagat leat eakti duodji ja maid lea buvttadan sápmelaš.
- Sámiráđđi vásiha, ahte Sámi dujiin ja buktagiin lea stuora árvu ja jáhkká, ahte oastit vállješedje sámi duoji dahje sámiid duddjon buktagiid, jus oččoše dan vejolašvuođa. Dan mii háliidit sidjiide fállat mearkkaid bokte ja dainna lágiin nannet sámi ealáhusaid gilvofámu, dadjá Sámi gálvomearkkaid prošeaktajođiheaddji, Sandra Márjá West.
Ođasmahttojuvvon Sámi Duodji -mearka
Sámiráđđi lea ovttas duodjeorganisašuvnnaiguin ođasmahttán Sámi Duodji -mearkka ja almmustahttá danin mearkka dál ođđasit. Sámi Duodji -mearka lea árbevirolaš duoji mearka, mii ásahuvvui 80-logus ovttasbarggus Sámi duodjeorganisašuvnnaiguin. West muitala, ahte sii leat ovttasbargan Sámi duodjeorganisašuvnnaiguin, mat ain oidnet stuora dárbbu merkii, danin go Sámi duoji suoládeapmi lea ain stuora hástalus Sámi servodagas. Lei maiddái dárbu heivehit njuolggadusaid dálá áigái ja nannet mearkka márkanfievrrideami, muitala West.
- Sámiráđđi lea ožžon ruhtadeami gálvomearkkaid márkanfievrrideapmái. Sámiráđđi lea digitaliseren ohcanskoviid, vai mearkkaid lea álkit ohcat. Oastiide šaddá maiddái álkit gávdnat duojáriid ja sámi buvttadeddjiid samitrademarks.com-neahttasiiddu bokte.
West muitala, ahte danin go sii leat ođasmahttán njuolggadusaid ja hábmen digitála registara gaskkustan dihte Sámi duojáriid ja buktagiid, fertejit dál buohkat, geain lea mearka, ohcat mearkka ođđasit.
- Mii sávvat sihke boares ja ođđa geavaheddjiide bures boahtin. Jus mii áigut lihkostuvvat mearkaortnegiin, de dat eaktuda, ahte sápmelaččat váldet mearkkaid atnui. Dušše dalle mearkaortnet doaibmá mihtuid mielde.
Govva: Sámi Duodji Sameslöjdstiftelsen
Sámi Made -mearka
Barggadettiin duodjemearkkaiguin lea boahtán ovdan, ahte Sámi servodagas lea maid dárbu merkii, man sáhttá geavahit eará buktagiidda go árbevirolaš duodjái, ja mii duođašta, ahte buktaga lea buvttadan sápmelaš. Dán ođđa mearkka namma lea Sámi Made. Dan sáhttá geavahit buot buktagiidda, man sápmelaš lea dahkan. Dákkár buktagat sáhttet leat ovdamearkka dihte design, čiŋat, turistagálvvut, girjjit dahje eará fysalaš gálvvut.
- Mis leat dán áigge olu iešguđetlágan buktagat, maid sápmelaččat ráhkadit ja daid gilvofámu háliidit maid nannet mearkka bokte, muitala West.
West muitala maiddai, ahte dan dihte go Sámi Made lea áibbas ođđa ortnet, de Sámiráđđi áigu bovdet sámi fitnodagaid searvat pilohttajovkui. Joavkku ulbmil lea gávnnahit, mo mearka doaibmá ja gálggašii go dan heivehit dahje rievdadit sámi servodahkii vel buorebut. Sámiráđđi sávvá, ahte sámi fitnodagat ja buvttadeaddjit oidnet mávssolažžan searvat pilohttajovkui.
Dehálaš ovttasbargu
Sámiráđđi lea bargan jagi 2015 rájes dáinna prošeavttain ja dat lea vuđolaččat gulahallan sihke duodjeservviiguin ja duojáriiguin. Sámiráđi kulturossodaga jođiheaddji Christina Hætta lea ilus, go gálvomearkkaid sáhttet viimmat geavahišgoahtit:
- Dál leat gálvomearkkat almmustahtton ja beassat viimmat joatkit boahtte lávkkiin, mii lea márkanfievrridit mearkkaid ja gulahallat duojáriiguin ja eará sámi ealáhusaiguin, ahte movt vel buorebut láhčit gálvomearkaortnega Sámi buorrin.
Duodjemearkaprošeavtta leat ruhtadan Amerihká ambassádat Ruoŧas, Suomas ja Norggas. Prošeavtta ovttasbargoguoimmit leat Sámi Duodji Suoma bealde, Sámi Duodji/ Sameslöjdstiftelsen Ruoŧa bealde, Duodjeinstituhtta ja Sámi Duodji Norgga bealde.
Loga eanet mearkkaid birra ja sádde ohcamuša čujuhusas www.samitrademarks.com.
