Sámiráđđi jugii jagi 2023 kulturdoarjagiid
Sámiráđi kulturlávdegoddi lea juohkán jagi 2023 kulturdoarjagiid. Doarjagat juhkkojuvvojedje iešguđet kultursurggiide miehtá Sámi oktiibuot 2 085 000 NOK. Kulturdoarjagiid ulbmil lea doarjut, ealáskahttit ja ovddidit oktilaš sámi dáidda- ja kultursuorggi. Doarjaga sáhttet ohcat ovttaskas sápmelaččat, sámi joavkkut ja sámi searvvit. Doarjagiid juohkimis deattuhuvvojit earenoamážit doaimmat, mat fátmmastit olles Sámi. Kulturdoarjagiid ruhtada Davviriikkaid ministtarráđđi.
Bargostipeandda ožžo Elle Valkeapää, Moa Backe Åstot, Elin Kåven ja Merja Aletta Ranttila
Sámiráđđi jugii jahkái 2023 oktiibuot njeallje bargostipeandda. Jagi guhkkosaš bargostipeandda ožžo Elle Valkeapää (duodji, 200 000 NOK), Moa Backe Åstot (girjjálašvuohta, 200 000 NOK), Elin Kåven (musihkka ja girjjálašvuohta, 200 000 NOK) ja Merja Aletta Ranttila (dáidda, 200 000 NOK).
- Bargostipeandaohcamušat bohte sullii seammá ollu go prošeaktadoarjjaohcamušat. Dát govvida bargostipeanddaid mearkkašumi Sámis. Daidda lea jagis jahkái Sámis stuorra dárbu. Dát lei maiddái okta sivva dasa, manin mii mearrideimmet juohkit golmma bargostipeandda sadjái njeallje bargostipeandda, dadjá Sámiráđi kulturlávdegotti jođiheaddji Mary Sarre ja sávvá lihku dáidda- ja kulturbargui.
Ohcamušat unnit go dábálaččat – Ruošša bealde eai boahtán ohcamušat
Sámiráđi jahkásaš kulturdoarjagiidda bohte unnit ohcamušat go diibmá. Prošeaktadoarjjaohcamušaid mearri njiejai, muhto bargostipeandaohcamušat bohte binnáš eanet. Okta sivva dasa, ahte prošeaktadoarjjaohcamušaid mearri njiejai, lea dat ahte ovttasbargu Ruošša beallái lea boatkánan máilmmi dili dihte, man geažil Ruošša beale sámit eai sáhttán ohcat Sámiráđi kulturdoarjagiid dán jahkái.
- Lea šallošahtti, ahte mii eat sáhte doaibmat Ruošša beale sámiid buorrin dálá dilis. Sámiráđi kulturdoarjagiin lea leamaš stuorra mearkkašupmi guovllu kultuvrii. Sávvamis dilli ložže boahtteáiggis ja min ovttasbargu lea fas vejolaš, gávnnaha Sarre. Gávnnat ollislaš listtu buot juolluduvvon doarjagiin dieđáhusa vuolleoasis.
Bargostipeanddat 2023
Elle Valkeapää
Gová Lásse Lásse Elle lea bajásšaddan Anáris ja su váibmobáiki lea Robivuomis, Suomanjárggas. Son atná árvvus árbevieruid ja lea háliidan bidjat iežas áiggi oahppat duddjot. Duodji lea sutnje váimmu ášši: “Munnje duodji lea giella mainna čájehan dovdduid ja ráhkisvuođa. Dat lea oktavuohta (buolvvas bulvii) ja stuorra lihkku ja lean čeavlái iežan duogážis ja iežamet árbevieruin. Duddjon addá fámuid ja jeđđe. Nanosmahttá ja ovttastahttá. Dat lea eallinvuohki ja eallima ja birgema ovddideaddji. Dat lea maid vuohki váikkuhit áššiide ja dahkat kultuvramet oidnosii maiddái earáide. Duodji eallá áiggis. Dat lea oktanaga boaris ja ođđa. Árbevirolaš ja ođđaáigásaš.“
GOVVA: SUNNA VALKEAPÄÄ
Moa Backe Åstot
Moa Backe Åstot lea sámi girječálli, guhte lea eret Jåhkåmåhkkes. Son almmustahtii jagi 2023 iežas vuosttaš romána, Himlabrand, mii lei čujuhuvvon nuorra rávesolbmuide. Girji lea leamaš evttohassan August Prize -bálkkašupmái. Su nubbi girji, Fjärilshärta, almmustuvvá giđđat 2023. Bargostipeanda fállá sutnje vejolašvuođa čiekŋut čállimii olles jahkái, goas son áigu čállit iežas vuosttaš girjji julevsámegillii.
GOVVA: CJ UTSI
Elin Kåven
Kárášjohkalaš Elin Kåvena oallugat dovdet artistan ja juoigin. Son lea badjel 15 jagi bargan Sámi musihkain. Dán jagi son áigu viididit iežas barggu eará surggiide. Son lea čállimin moadde mánusa, main su musihkas lea stuorra rolla. Son bargá earret eará mánáid jietnagirjjiin, masa son čatná iežas musihka. Su váldofáttát leat árbevirolaš Sámi árvvut, eallinvuohki ja -oaidnu ja oktavuohta luondduin.
GOVVA: MADS SUHR PETTERSEN
Merja Aletta Ranttila
Merja Aletta Ranttila lea govvadáiddár, illustrerejeaddji ja dáiddágrafihkkar, gii lea eret Gáregasnjárggas. Bargostipeanda fállá sutnje vejolašvuođa dahkat maleriijaid, grafihka, reliefiid ja sadjedáiddabargguid. Dasa lassin son áigu gárvet Ánde-nammasaš girjjis. Su dáidaga oallugat dovdet symbolihkas, niehkolágan atmosfearas ja biro- ja nissonhámiin, ja maiddái oainnuin máilmmi dilis, luondduroasuin, olbmo billašuddamis ja mánnávuođa lestadionismma dagahan hirpmástuvvamis ja biro fámuin. Sutnje dáidda lea eallinvuohki ja terapiija.
GOVVA: MERJA ALETTA RANTTILA
Prošeaktadoarjagat 2023
1. Sámi Duodji, Sámi Duodjis 30-årsjubileum, kr 60 000,00
2. Binnáš vel!, Lena Persson retrospektiv, kr 40 000,00
3. Rein Film Finnmark, Pappa er en dansk hulemann, kr 50 000,00
4. Ole-Henrik Lifjell, Gaskeme, kr 50 000,00
5. Ella Marie Hætta Isaksen, Dolvot, kr 50 000,00
6. Sámij åhpadusguovdásj, Jubileumsår - bild- och slöjdutställning, kr 50 000,00
7. Raasten rastah, Raasten rastah, kr 50 000,00
8. Liselotte Wajstedt, Lisa och Cilla, kr 50 000,00
9. Riddu Riđđu Festivála AS, Mánáidfestivála 2023, kr 40 000,00
10. Mun dajan Forenga Samiske forfattere, Mun Dajan - samisk litteraturfestival 2023, kr 25 000,00
11. Lopme Naestie, Samiska kulturdagar, kr 40 000,00
12. Sunna Utsi Music Productions, Vuosttas skearru, kr 25 000,00
13. Ritni Pieski, Iežame sogaid luđiid oahppamii ja dutkamii, sihke lávdebihttá bargamii, kr 50 000,00
14. Sámi musihkkafestivála, Sámi Grand Prix 2023, kr 50 000,00
15. Frans Vilhelmi Saari, Musihkkaprošeakta WIMME&RINNE, kr 20 000,00
16. Sámi Dáidaga doarjjasearvi rs, Eamiálbmogiid Filbmafestivála Skábmagovat, kr 50 000,00
17. Jalvvi Niillas Holmberg, Luođik -luohtejietnaduodji, kr 50 000,00
18. Ánne Márjá Guttorm Graven, Gullo gullo, kr 50 000,00
19. Anna Näkkäläjärvi-Länsman, Modeardna luohteálbuma buvttadeapmi, kr 50 000,00
20. Siidaskuvla, Siidaskuvlla girjji olggosaddin, kr 50 000,00
21. Laura Tapiola, Jearahallat árbeguoddiid, kr 10 000,00
22. Auri Ahola, Viehâ, kr 30 000,00
23. Laura Tapiola, Ođđa konseartaprogámma plánen ja hárjehallan ovttas musihkkáriiguin, kr 40 000,00
24. Anára Sámisearvi ry, Ijahis idja 2023 - eamiálbmogiid musihkkafestivála, kr 50 000,00
25. Ellen-Maarit Juuso, Gárddis, kr 20 000,00
26. Samuel Valkeapää, Stockholmma musea sámečoahkkáldahkii oahpásmuvvan, kr 30 000,00
27. Hannu Antti Magga, Giehtačállosa válmmastallan, kr 50 000,00
28. Hetta Jouko Iisakki, Sámi árbevirolaš huksen, luovvi, kr 45 000,00
29. Erke Eriksen, Sámegielat heavy metal musihkkaalbuma almmustahttin, kr 25 000,00
Liigedoarjagat 2023
1. Erika Johansen ja Hánná Sofe, Oassálastin WINHEC:a jahkečoahkkimii, kr 25 000,00
2. Harry Johansen, Luossamoraš, kr 40 000,00
3. Joar Nango, Oassálastin Girjegumpi, jorgaleapmi, kr 20 000,00
Ruovtturesideansa 2023
Ruovtturesideansastipeanddaid giđđii 2023 ožžo Simon Issát Marainen (girjjálašvuohta), Heidi Gauriloff (girjjálašvuohta, dáidda, giella), Gáddjá Haarla Pieski (lávdedáidda), Anthoni Hætta (musihkka) ja Lena Viltok (sámi dudji). Okta stipeanda lea 50.000 NOK. Loga ruovtturesideanssa birra eambbo dáppe.
Lassedieđut:
Mary Sarre
Kulturlávdegotti jođiheaddji
+47 986 79 544
mary(at)sarre.no
Unna-Maari Pulska
Sámiráđi kulturčálli
+ 358 44 555 3897