Sámiráđđi jugii nuppádis dán jagi Dalán-doarjagiid

Govas oidno Anna Morottaja, gii lea okta dain geat ožžo Dalán-doarjaga nuppi ohcanjorrosis. Morottajai juolluduvvui Dalán-doarjja, mii láhčá sutnje vejolašvuođa beassat oassálastit Usedom-musihkkafestiválii Duiskkas, gosa son lei bovdejuvvon ovdanbuktit Suoma sámiid musihkkaárbevieruid. Su ovdanbuktima guovddážis lea earenoamážit anáraš musihkkaárbevierru livđe, mii lea su váimmu lahka. Govvejeaddji: Geert Maciejewski.

Sámiráđđi almmustahtii jagi álggus ođđa doarjjahámi, man namma lea Dalán-doarjja. Ođđa doarjjahámis lei jagi nubbi ohcanáigi borge-čakčamánus. Nuppi ohcanáiggi siste bohte 25 ohcamuša oktiibuot 459 915 Norgga ruvnno ovddas. Dán ohcanjorrosis lei juohkin láhkai oktiibuot 180 000 Norgga ruvnno, mii juhkkojuvvui 11 ohccái. 

-       Ohcamušaid mearis sáhttá fas oaidnit man stuorra dárbu mis Sámis lea kulturdoarjagiidda. Dat muitala maid, ahte sámi dáiddá- ja kultursuorgi lea aktiivvalaš, ja ahte min olbmuide lea dál jearru, dadjá Sámiráđi kulturlávdegotti ságajođiheaddji Lada Suomenrinne.

Dalán-doarjja lea Sámiráđi ođđa doarjjahápmi, mii almmustuvai jagi álggus. Dat lea hábmejuvvon doarjut sámi dáidda- ja kultursuorggi vuorddekeahtes, hohpolaš ja dihto áigemearrái čadnon dáhpáhusain. Doarjaga sáhttet ohcat ovttaskas sápmelaččat, máŋga sápmelačča fárrolaga ja searvvit. Dalán-doarjaga sáhttá oažžut eanemustá 20 000 Norgga ruvnno. Sámiráđi kulturdoarjagiid ruhtada Davviriikkaid ministtarráđđi.

Dalán-doarjaga vuostáiváldit:

1. Emma Elliane Oskal Valkeapää: Árktalaš Orkesterii čállit notaid 14 000 NOK

2. Anna Morottaja: Usedom festivála Duiskkas 16 000 NOK

3. Hanne Grieg Hermansen: Utstilling Kohta 11 000 NOK

4. Linn Isabel Eielsen: Aina og Stallo 20 000 NOK

5. Camille Therese Karlsen: ČSV scenekunstsamarbeid på Suialaa Arts festival 20 000 NOK

6. Liselotte Vajstedt: Finnish premiere at the Helsinki international film festival 10 000 NOK

7. Sunna Nousuniemi: Ovdabuvttadeapmi: ASAP-turnea Lulli-Sámis 2025 20 000 NOK

8. Nils-Ove Kuorak: EP bádden 15 000 NOK

9. Pia Katarina Jannok: Original festivalen in Mexico City 14 000 NOK

10. Iŋgá-Máret Gaup-Juuso: Sámegiel lávlagat – studiobádden ja buvttadeapmi 20 000 NOK

11. Elin Kåven: Nettverksbyggende reise til USA 20 000 NOK

Lassedieđut:

Lada Suomenrinne

Kulturlávdegotti ságajođiheaddji

lada.suomenrinne(at)gmail.com

Unna-Maari Pulska

Kulturčálli

unnamaari(at)saamicouncil.net