Sámiráđđi jugii vuosttaš geardde Dalán-doarjagiid
Sámiráđi kulturlávdegoddi jugii vuosttas geardde Dalán-doarjagiid. Dalán-doarjagat lea ođđa ortnet, mii lea hábmejuvvon doarjut sámi dáidda- ja kultursuorggi vuorddekeahtes, hohpolaš ja áigeguovdilis dilálašvuođain.
"Mii oaččuimet eanet ohcamušaid go livččiimet sáhttán vuordit ja leat oahppan olu kultursuorggi dárbbuid birra dán barggu bokte. Ohcamušaid stuorra mearri govvida sámi dáidda- ja kultursuorggi dárbbuid dákkáraš veahkkeruđaide", muitala Sámiráđi kulturčálli Unna-Maari Pulska.
Sámiráđđi almmustahtii ođđa Dalán-doarjaga jagi 2025 álggus. Dalán-doarjagiidda lei várrejuvvon 150 000 NOK, mii juhkkojuvvui oktiibuot 13 olbmui ohcamušaid vuođul. Oktiibuot bohte 43 ohcamuša, mat ohce doarjaga oktiibuot 817 175 ruvnno ovddas.
Sámiráđi kulturlávdegotti ođđa ságadoalli Lada Suomenrinne lei vuosttaš geardde mielde gieđahallame ohcamušaid ja lea ilus oaidnit ahte Sámi kultursuorggis leat nu olu miellagiddevaš doaimmat jođus: "Mii leimmet ožžon olu ohcamušaid ja livččiimet háliidan juolludit doarjagiid eambbosiidda. Goittotge fertiimet dahkat mearrádusaid min resurssaid rájáid siskkobealde, man dihte ollu buorit ohcamušat báhce olggobeallái. Vuoruheimmet mearrádusaid dagadettiin doaimmaid, mat min mielas heivejedje erenomážit Dalán-doarjjaortnega ollái.", muitala Suomenrinne.
Dalán-doarjagiid lassin Sámiráđđi juohká prošeaktadoarjagiid, mátkestipeanddaid ja jagi guhkkosaš bargostipeanddaid. Ohcanskovit eará veahkkeruđaide rahpasit giđa loahpageahčen. Dalán-doarjagiid sáhttá ohcat čuovvovaš háve čavčča bealde.
Lassidieđut:
Lada Suomenrinne
Kulturlávdegotti ságajođiheaddji
lada.suomenrinne(at)gmail.com