The State of Sápmi čalmmusta Sámiráđi 70-jagi ávvudeami
The State of Sápmi maŋimuš almmuhus “Sámiráđđi 70 jagi” almmustahttojuvvo oassin Interreg Aurora ruhtadan ReCap ASáp: Regaining capacity in a changing Sápmi -prošeavtta. Govva: Sámiráđđi / Piera Heaika Muotka
The State of Sápmi maŋimuš almmuhus čalmmustahttá Sámiráđi 70-jagi ávvudeami, go organisašuvdna vuođđuduvvui Sámiid 2. konferánssas Kárášjogas borgemánu 18. b. 1956.
Katri Somby. Priváhtagovva.
Artihkkalis lea bajilčála "Mii fertet fas deaivvadit" – "We Must Meet Again" – ja dat guorahallá movt sámi ovttasbargu ovdánii čoahkkimiid, gulahallama ja organiserema bokte rastá riikkarájáid mat juhket Sámi máŋgá oassái.
Historihkkár Katri Somby muitala Sámiráđi ovdáneami birra árra ovttasbarggu rájes duoji ja kultuvrra surggiin, oktasaš sámi politihkalaš jiena čuožžileami rádjai. Logiid jagiid mielde šadde sámekonferánssat dehálaš arenan gos leat mearridan ja gieđahallan giela, kultuvrra, politihkalaš prográmmaid, nationála symbolaid ja riikkaidgaskasaš ovttasbarggu.
Artihkal čájeha maiddái movt Sámiráđđi 1970-logu rájes oaččui eanet ja eanet čielga riikkaidgaskasaš rolla, earret eará ovttasbarggu bokte eará eamiálbmogiiguin ja barggu bokte ovddidit eamiálbmogiid vuoigatvuođaid ON-vuogádagas.
“ Sámiráđđi vuođđuduvvui álkes, muhto fámolaš jurdaga vuođul; ahte mii, Sámit, lea okta álbmot”
Per-Olof Nutti, Sámiráđi presideanta. Govva: Sámiráđđi / Piera Heaika Muotka
– Sámiráđđi vuođđuduvvui álkes, muhto fámolaš jurdaga vuođul; ahte mii, Sámit, lea okta álbmot, čállá Sámiráđi presideanta Per-Olof Nutti ovdasánis.
Dát jurdda lea leamaš guovddážis Sámiráđi 70 jagi barggus: nannet ovttasbarggu sámiid gaskkas rastá rájiid, giela ja politihkalaš duohtavuođaid, ja bargat sámi iešmearrideami ovdii sihke Sámis ja riikkaidgaskasaččat.
Almmuhus almmuhuvvo digitála hámis borgemánu 18. beaivvi, juste 70 jagi maŋŋá go Sámiráđđi vuođđuduvvui.
The State of Sápmi maŋimuš almmuhus “Sámiráđđi 70 jagi” almmustahttojuvvo oassin Interreg Aurora ruhtadan ReCap ASáp: Regaining capacity in a changing Sápmi -prošeavtta, man ulbmilin lea buoridit máhttovuođu ja ovddidit fátmmasteami sámiide guoskevaš mearrádusdahkamis.
Loga olles almmuhusa dás:
Áigečállaga birra
The State of Sápmi lea Sámiráđi áigečála dutkanvuođđuduvvon artihkkaliiguin, esseaiguin ja analysaiguin Sámi servodaga, politihka, historjjá ja Sámi álbmoga vuoigatvuođaid birra.
Áigečálus guorahallá movt sosiopolitihkalaš áššit váikkuhit Sámi álbmogii miehtá Sámi, erenoamážit iešmearrideami, eamiálbmotrivttiid, eanangeavaheami, hálddašeami, kultuvrra ja doibmiibidjat riikkaidgaskasaš olmmošvuoigatvuođastandárddaid.
Áigečála, The State of Sápmi, almmuhuvvon fáddáčálusin ja čohkke dutkiid, áššedovdiid, doaimmaheddjiid ja Sámi máhttoguddiid perspektiivvaid. Áigečállaga áigumuš lea dahkat máŋggabealat áššiid áddehahtti eanet olbmuide ja veahkehit ovddidit bures dieđihuvvon almmolaš digaštallama.
The State of Sápmi joatká juo dálá sámi árbevieru gos buvttada máhtu ja dutkama eamiálbmotvuoigatvuođaid birra, ja dasa gullet ovddibut vuođđovuogádagat nugo Gáldu Čála.