Suoma sámediggeláhka leamašan gieđahallamis ekonomiijaválljogottis
Maŋŋebárgga 10.1. lei sámediggeláhkaođastus gieđahallamis ekonomiijaválljogottis. Gullamiidda ledje bovdejuvvon iešguđet ovddasteaddjit ja maiddái Sámiráđi presideantta Áslat Holmberg lei báikki alde.
Cealkámušas válljogoddái Holmberg buvttii ovdan man stuorra dárbu lága ođasmahttimii lea. Dála láhka rihkku Suoma čadni olmmošvuoigatvuohtasoahpamušaid ja ođđa láhka livččii vuohki divvut dáid boasttuvuođaid.
Otná láhka suomaidahttá Sámedikki, ja áitá Sámedikki luohttehahttivuođa ja sáhttá moivet Sámi álbmoga ja suopmelaččaid gaskavuođaid. Árvalus ođđa láhkii livččii lávki buoret guvlui. Nuppe dáfus, de buktá láhkaárvalusa evttohusa 9. čuoggá min lagabui friddja ja dihtui vuođđuduvvi ovdamiehtama prinsihpa (FPIC). Dás lea stuorra ja deahalaš mearkkášupmi sámi riektedillái Suomas.
– Dát láhka ii leat dievaslaš muhto dán buoret evttohusa mii eat leat oaidnán guovtti ovddit ráđđehusasge. Dát ođastus buvttášii stáđisvuođa ja nannešii buriid doaibmavugiid. Maiddái olggobeale investoriidda livččii buorrin, jos Suomas livččii beaktilut proseassa sámedikkiin ráđđádallat ja guorrasit gaskariikkalaš lága FPIC prinsihpa čuovvoleapmái. Dál lágas lea maiddái Sámedikki historjjálaš nana doarjja duohken, juohke giellajoavkkus, lohká Holmberg.
Loga olles cealkámuša dáppe: Lausunto talousvaliokunnalle saamelaiskäräjälain uudistamisesta (suomagillii)
